Grammy Award vuak hot nan Miley leh Gaga thlalak

Grammy Award vawi 60-na chu Madison Square Garden, New York-ah sem a ni a, hemi vuak hot nan hian Miley Cyrus leh Lady Gaga te thlalak chu kawtthlerah tar a ni.

Miley leh Gaga te thlalak mit la tak mai hi Inrinni zing khan lianpuiin an tar a, Long Live Music tih a inziak kulh bawk. Advertisment atana thlalak duhdak vak lo hman a nih avang hian sawiselna a nasa hle a, mahse hei hi model tam takten mipat heichhiatna lamah beih an tawh ṭhin duh lohna lantirna a nih thu a buatsaihtu lam chuan an sawi. Kum liam ta chhung khan khawthlang ramah mipat hmeichhiatna lama hmingchhiatna a nasa hle a, Hollywood industry pawh a nghawng na hle. Actress lar leh hrawlpui puiten an zahawmna tihbawrhbang thei zawnga beih an tawh thu te an sawi a, film siamtute leh studio neitu lamte pawh he thilah hian an inhnamhnawih thute a ri ring hle.

Film industry a ni emaw music industry lam pawh ni se, award sem a awm apiangin he lam hawi hi sawi rik a ni ziah bawk. Music Industry-ah pawh ngawng a nei tih a hriat a, kumina Grammy Award semah pawh hian hemi duh lohna lantir hian poster siam a ni. Poster siamtu Sabo chuan Hollywood-a thil duhawm lo tak thleng duh lohna lantira siam an nih thu sawiin, music industry-ah bu a khuar ve zel lohna tura an beihna a nih thu a sawi bawk.

Grammy Award hi Los Angeles-ah sem ṭhin a ni a, kuminah hian 2003 hnu lama a vawi khat nan khawpui dangah sem a ni. New York khawpuiah chuan he show hi a thleng a, khawvel huapa zaithiam larte an inlan a ni.