Box Office-ah roreltu thar Maze Runner-in Jumanji luahlan

Adventure film, Jumanji: Welcome to the Jungle chuan sum lakluh tam lamah tluk loh a nei ve ta a, chu chu science fiction film Maze Runner : The Death Cure a ni. Maze Runner chhuak thar hian kar liamta chhung khan $mtd 23.5 lalutin, roreltu a ni nghal chat.

Dwayne 'The Rock' Johnson channa Jumanji chuan kar eng emaw zat chhung chu Box Office-ah ro a lo rel tawh a, a sum lakluh zawng zawng pawh $mtd 767.8 zet a tling tawh a ni. Kar liamta chhung khan $mtd 16.4 lalut lehin, Box Office-ah phnihna a la luah pha tho a ni. Hetih lai hian January 24-a tlangzarh Maze Runner erawh tlangzarh a nih aṭangin dinhmun sang ber luahtu a ni nghal. A sum lakluh zat erawh a turu tehchiam lo a, film hlawhtling dangte nena an sumlakluh zat pawh khaikhin ngam chi a la ni rih lo. Film siam nana senso pawh $mtd 83 niin, budget sang tak a ni lo.

Maze Runner : The Death Cure hian The Maze Runner chhuak hmasaho chu sum lakluh tam lamah hian a phak lo bawk. The Maze Runner hmasa ber chu kum 2015 khan tihchhuah niin, tlangzarh aṭanga

kar khat chhunga a sum lakluh chu $mtd 32.5 a ni. Maze Runner: The Scorch Trials khan tlangzarh karin $mtd 30.6 a lalut bawk. Hetih rual hian Maze Runner thar hi kar liam ta aṭang khan North America-a theater hrang hrangah chhuah a ni ṭan chauh a, Theater 3,787-a chhuahna aṭanga a sum lakluh hi $mtd 23.5 lai a tling a ni. US leh khawvel hmun dang aṭanga a sum lakluh tawh zawng zawng chu $mtd 105.5 lai a tling tawh bawk.

Box Office-a pathumna chu kumina tlangzarh tho Hostiles niin, kar khat chhunga a sum lakluh zat chu $mtd 10.2 a ni. The Greatest Showman chu sum hailut tam zingah a tel leh bawk a, $mtd 9.5 lalutin palina a ni. The Post chu pangana-ah awmin, The Shape of Water chu sum lalut tam 10 zingah a tel leh bawk.