Olivia Rodrigo leh BTS aia langsar an awm hleithei lo

Tunkar Billboard chart-ah Olivia Rodrigo leh BTS bawk an langsar leh. Olivia Rodrigo chu Album 200 chart-ah pakhatnaah a rawn invawrh leh a, BTS pawh Hot 100 chart-ah No.1 an ni ve leh bawk.

Olivia Rodrigo 'Sour' a invawrh leh
Olivia Rodrigo studio album hmasa ber 'Sour' chu a vawi thumna atan Billboard 200 chart-ah No.1 a ni leh a, kar hmasa lamah khan pathumnaah awm mah se tunkarah erawh pakhatnaah a rawn inhlangkai leh ta a ni.

A tlangzarh aṭangin kar sarih lai liam tawh mah se kar hmasa chhung khan equivalent album unit 88,000 a la hmu chhuak thei tih MRC Data chuan a tarlang.

Doja Cat album thar 'Planet Her' chu pahnihna bawk a ni leh a, Lil Baby & Lil Durk 'The Voice of The Heroes' chu pathumna a ni thung.

'Sour' hi UK chart lamah pawh pakhatna a ni leh a, Queen 'Greatest Hits' pawhin a tluk zo lo a ni.

'Good 4 U' a la ṭha tawk
'Good 4 U' hitmaker hi tunah hian Artist 100 chart-ah pakhatna a ni leh tawh a, a hla 'Good 4 U' chu Songs of the Summer chart leh Hot 100 chart-ahte pahnihna a ni a, Billboard Global 200 chart-ah phei chuan pahnihna a ni.

BTS 'Butter' a la tui
Billboard Hot 100 chart-ah BTS 'Butter; chu a zawnin kar sarih chhung lai pakhatna a ni ta. Record hrang hrang an siampui tawh 'Butter' hi a la hit chhunzawm zel a, karleh lamah erawh an hla thar 'Permission to Dance' in anmahni hla bawk hi a rawn luahlan thut thei. An hla thar hit chhoh dan thlirin chutiang thil chu a thleng a nih pawhin mak lo ti lutuk duh suh.

BTS hi tunah hian Artist 100 chart-ah pahnihna an ni mek a, Songs of the Summer chart-ah pakhatna an ni mek bawk.

Artist langsar dang
Ed Sheeran 'Bad Habits' chu Global Excl. US chart-ah pakhatna niin, he hla hi Billboard Global 200 chart-ah pahnihna a ni thung.

Italian rock band Maneskin pawh an lar chho zel a, an hla 'Beggin' chu Global 200 chart-ah pathumna a ni a, Global Excl. US chart-ah pahnihna a ni bawk. Anni hi Rock chart lamah phei chuan topper a ni mek.