‘Star Trek’ Film director thar Matt Shakman

‘Star Trek’ film thar tur, a film title pawh an la tihchian loh director tur chu Marvel/Disney+ series WandaVision Matt Shakman a ni dawn.

Hemi chungchang tarlang hmasatu Deadline chuan nakkum nipuiah chuan he film hi an chang ṭan tawh dawn niin an sawi a, Lindsey Beer leh Geneva Robertson-Dworet-te chuan script an ziak a ni. He film hi hmeichhiain 'Star Trek' film script an ziah hmasak ber tur a ni ang.

'Star Trek' hi kum 1966 aṭang khan TV series-a tihchhuah a ni tawh a, tun thleng hian series hrang hrang bakah movie hrang hrang an siam hnem tawh hle. Movie 13 lai a awm tawh a, tuna an siam thar leh tur hi a 14-na tur a ni chiah ang.

Animated series pawh pahnih an siam tawh a, tihchhuah mai tura ruahmanna siam mek a awm bawk.