Ellen DeGeneres-i'n chawlh la tum lo

American comedian Ellen Degeneres chuan a kum tam ve deuh tawh mah se mipui hmaa inlan chhunzawm zel a la tum thu a sawi.

Ellen hi comedian, television host, actress, writer leh producer a ni teh duah a, khawthlangah chuan mi thil tithei ber zinga mi a ni. Lar pawh a lar viau a, a chanchin hi mite ngaihven ber pakhat a ni. Heti chung hian a kum a tam ve deuh tawh avangin chawlh a tum hnai em tih zawhna pawh a dawng nual a, mahse kum 60 mi hian chawlh lam a rilruah a la lang lo tih a sawi.

Ellen chuan, "Ka hna hi nuam ka ti a, mipui hmaa inlan zel pawh ka duh a ni. Chawl ila eng nge ka tih ang, tih tur tam tak ka la nei a ni" tiin, chawlh a la tum loh thu a sawi. Hetih rual hian kum 60 a tling ve ta mai chu mak a tih thu leh, amah pawh a inrinhlelh hial thu fiamthuin a sawi. Ellen chuan mi hlimna thlentu nih chu nuam a tih thu a sawi bawk a, amah tichaktu leh a hna nuam titaka a thawh theih chhan a ni thu a sawi.