Kate Middleton-i'n Cancer veite tan a sam donate

Duchess of Cambridge Kate Middleton chuan naupang ṭhenkhat, cancer natna avanga sam tlakawlhte tan a sam a donate.

British lal tupa Prince William-a nupui Kate hian tun hnai khan naupang cancer veite enkawlna, Little Princess Trust-ah a sam inches sarih zeta sei chu a donate a, hei hi sam tlakawlhten an lo hman tur sam lem siamna atana a pek a ni. Kate Middleton hian a sam ṭha tak hi a larpui hle nghe nghe a, midang ṭanpuina atana a hman avang hian fak pawh a hlawh hle.

Little Princess Trust enkawltu Helen Creese chuan, "Tun hnaiah ṭanpui­na eng emaw zat kan dawng a, chung zingah chuan sam lem siamna tur pawh a tel. Hmun hrang hrang aṭanga sam lem siamna tur kan dawn thawhtu zingah hian Kate Middleton pawh a tel tih kan hriat khan kan lawm hle a, naupangte pawh an phur tak zet a ni" tiin lawmthu a sawi. One Direction member Harry Styles chuan kum hnih liam ta khan he charity tan vek hian sam lem siamna tur ṭhahnem tak a lo thawh ve tawh bawk.