Film Review : Grace film, Rosangpuii a hmuhnawm leh viau

Mizo Kristian film Grace chu Nilaini khan Bawmrangtv kaltlangin tihchhuah a ni ta a, a duh apiang tan he application kaltlang hian Rs 199 lek chawiin a en theih tawh.

Grace film hi nula pakhat Muanpuii (Rspi) chanchin a ni deuh ber a, a nun khawngaihthlak tak leh harsatna hrang hrang Pathian bel tlat chunga a paltlang dan tarlanna film a ni. A ṭhianpa Rina (Zorema Khiangte) sual bawiha tang mek leh a pa Pa Vala (Lalmalsawma) zu bawih ata a tal chhuahna film a ni bawk. Mizo film ṭha tak, zirtir nei ṭha, chhungkuaa en tlak tak a ni.

A lemchanna dang ang bawkin Rosangpuii a hmuhnawm lehpek a, a changthiam a, beisei a pha viau. Lemchan a thiam bawk a, a ṭah rualin he film entu hnuk no deuhte chu an insut leh fap fap dawn tih a chiang. Chutiang bawkin Zorema chevel a hmuhnawm a, a zei fu mai.

Min tihlim thei scene tlem azawng a awm a, a tam ber erawh lungkuai lam a ni thung. Zai lam ngaina tan zai ngaihnawm tak ngaihthlak tur a awm zeuh zeuh a, Pa Vala zai lai 'scene' phei chu mi tam tak lung tichhe tur a ni dawn tih a chiang.

Love Story i beisei a nih chuan, a film tam berah i beisei i hmu lo ang. A tawp lamah erawh tlem azawng chu a inzep ve zeuh e.

Mihring nun beidawngte tana talchhuahna awmchhun chu 'Lal Isua' a ni tih chu a film-in lantir a tum ber niin a lang.

Film duhthusam erawh a awm thei lo. Chuti chung chung chuan Mizo film tam tak zinga hmuhnawm pawl tak chu a ni. A tir lam darkar chanve vel chu englam hawi nge a nih dawn hriatthiam a har ṭep a, mah se chumi hnulamah erawh khawdang hawisawn a har tawh viau thung. Darkar 2 leh minute 16 vel lai a ni a, mi tam tak tan erawh chuan a thui hlek mai thei bawk.

Mizo lemchan thiam, film danga kan hmuh tawhte an inlan nual a, zaithiam hmuh tur pawh an awm nual dawn a ni. Trailer lama kan hmuh tawh Duhsaki leh Jonathan Lianhna bakah zaithiam dang inlan pawh an awm ania!

Bawmrangtv hi application thar a nih angin duhthusamin a la 'smooth' zaih lo deuh thung. A buatsaihtu lam pawhin an tum hunah an tichhuak hman chiah lo.

Rs. 199 chuan en manhla tak a ni a, Hollywood film theatre-ah man to takin kan en ṭhin tho a, Mizo kut chhuak ngei hi hlut thiam ila, man chawi ngeia en tum ve pawh a ṭha viau mai.