Cinderella Guitarist Jeff LaBar a thi

US rock band Cinderella guitarist Jeff LaBar chu Nilaini khan kum 58 mi niin a thi a, he thu ziah lai thleng hian a thih chhan tarlan a la ni lo.

Cinderella lama a telpui ṭhinte chuan thuchhuah siamin Jeff LaBar thih thu hi an puangzar a ni.

Kum 1982-a Philadelphia-a indin American glam metal band Cinderella hian an indin aṭanga kum hnih liam hnuah an guitarist Michael Schermick thlak turin Jeff LaBar hi an la a ni. Mach22 leh Tantric band-ahte Jeff hi lead guitarist a ni bawk.

Cinderella hi an vanglai chuan band lar tak an ni ṭhin a, Bon Jovi leh Poison-te nen pawh tour ho ṭhinin an hla leh album-te chu Billboard chart lamah pawh a che ṭha ṭhin hle.