Billboard 200: Luke Combs 'What You See Is What You Get' 21-na aṭangin pakhatnaah

Billboard 200 album chart-ah  Luke Combs 'What You See Is What You Get'  pakhatna a ni a, Bruce Springsteen 'Letter To You' chu pahnihna niin Pop Smoke 'Shoot For The Stars Aim For The Moon' chu pathumna a ni.

Billboard 200 chart topper hi album thar a ni lo a, kum khat dawn liam taa Luke Combs-a'n a studio album pahihna 'What You See Is What You Get' a tlangzarh kha niin chart hmasaah pawh khan 21-naah a awm a, tunah erawh pakhatnaah a rawn invawrh a ni.

Chart-ah kar 51 lai lang tawhin tun hi No.1 a nih ṭum hnihna a ni. Album unit a hmuh chhuah zat chu 108k a ni a, album 19.7k US-ah hralhin song sales-ah 102.6k a hmu chhuak bawk a, stream mtd 89.3k a nei bawk. US-ah chuan kum khat hnuah Luke Combs album hi a lar thar leh hle. A hla 'Forever After All' phei chu Hit 100 chart-ah No 2-ah a invawrh lehnghal a, Rolling Stones Hit 100 chart-ah phei chuan No.1 a ni hial.

Bruce Springsteen studio album 20-na 'Letter to You' chu US-a album hralh leh ngaihthlak hlawh ber dawttu a ni mek a, October 23-a a tlangzarh kha niin album unit 83.3k a hmu chhuak.

Chart chung lama bu khuar nghet tak Pop Smoke 'Shoot For The Stars Aim For The Moon' chu pathumna a ni a, a tlahiam hlei thei lo.

Ty Dolla $ign album thar 'Featuring Ty Dolla $ign' chu palina a ni a, a studio album pathumna ni tawhin ani pawh hian Springsteen ang thoin October 23 khan a tlangzarh a ni. Juice WRLD 'Legends Never Die' chu pangana a ni a, chart hmasa lama pakhatna Taylor Swift 'Folklore' erawh 17-naah a tla thla daih thung.