John Mayer; Sob Rock Album a chhuak ta

John Mayer zai ngainaa, a guitar zut vel ngaihthlak nuam titan chuan nimin kha ni lawmawm tak a ni ngei ang. A studio album pariatna 'Sob Rock' chu a tlangzarh a, a hla dahte a mawiin a 80's ruih hlawm.

Album a tlangzarh hmaa a album-a hla tur 'single'-a a tihchhuah ho aṭangin a album thar hian 80's lam a hawi dawn tih a chiang tawh a, tunah erawh streaming platform hrang hrangah a album thara hlate ngaihthlak tur a awm tawh a, YouTuber guitarist ho pawhin YouTube lamah tutorial an siam leh sup sup ngei ang.

A album hming hi 'Sob' tih ni mah se John Mayer chuan Apple Music Zae Lowe-in a kawmnaah a album thar chu midang tihlim tura a tlangzarh a nih thu a sawi a, mahse hlimna chu thil hlu tak a nih hunlaia ka siam a ni, a ti.

Retro lam hawi rimawi ngaina tan chuan John Mayer-a album thara hlate hi ngaihthlak tlak tak tur a ni a, guitar solo mawi tak tak a zep leh nual bawk.

Hla 10 a awm a, chung zingah chuan single-a a tihchhuah tawh 'New Light', 'I Guess I Just Feel Light', 'Carry Me Away' leh thla hmasa lawka a tlangzarh 'Last Train Home' te kha a tel a, niminah khan music video thar a tichhuak lehnghal bawk a ni.

'Gravity' hitmaker hian album thar a tihchhuah apiangin genre a thlak ṭhin ti ila kan sawi sualin a rinawm loh. Pop music aṭangin rawn lar chhuak mah se Blues leh Country lam thlengin a hrut tawh a, tuna a album tharah hi chuan 'retro' lam a hawi thung a ni.

Kum 2017-a 'The Search for Everything' a tihchhuah hnua a album tihchhuah leh hmasak ber a ni a, a album thar tur tihlarna atana tour lam erawh a la hawi rih dawn lo niin a lang thung. Thlaleh aṭang hian US hmun hrang hrangah Dead & Company-te'n tour an neih rih dawn avangin 'Sob Rock' tour lam erawh a la sawi lang rih lo a ni maithei.

Shot in the Dark
John Mayer hian nimin khan album thar a tihchhuah rualin Music Video thar 'Shot in the Dark' a tichhuak a, a hla mai bakah music video a shoot dan zawng zawngah pawh 80's hunlaia tihchhuah niawm tak a ni.

Life is Complete: Rosé
Blackpink Rosé chuan John Mayer hnen aṭangin thilpek a dawng tlat mai. Rosé hian niminah khan Instagram lamah story update-in John Mayer hnen aṭanga a signature guitar PRS Silver Sky Roxy Pink a dawn avangin lawmthu a sawi a, 'Life is complete' tih ziak langin John Mayer a tag bawk.

Hetihlai hian Mayer pawh hian thuziak thawn telin 'Lawmthu hrilh tur che ka ni (Chuvang chuan ka lawm e)' tih a thawn tel. Rosé hian tunhnai lawk khan variety show JTBC ‘Sea of Hope'-ah John Mayer-a hla hit 'Slow Dancing in a Burning Room' chu mawi takin a 'cover' -a, chu chu Mayer pawh hian a social media account lamah a share nghe nghe.

Mahse.... JTBC ‘Sea of Hope-ah hian Rosé chuan Taylor Swift-i'n John Mayer tana a hla phuah ni ngeia lang, 'Dear John' a sa dawn nia sawi thawm a awm. Social media lamah fiamthu hmuh tur a awm zui nghal," 'Dear John' a sak chuan John Mayer hian guitar chu a lakletsak leh mai ang em?" tiin.