CR7 IG record khumtu Lionel Messi

Argentine football legend Lionel Messi-in Copa America trophy thla a lakpuina Instagram lama a post chu nimin thleng khan like-tu maktaduai 20 chuang an awm tawh a, hei hi infiammiin Instagram-a post an siam like ngah ber record a ni hial.

Nikuma Argentine football legend tho Diego Maradona a thi uina thu leh thlalak Cristiano Ronaldo-in a post kha like ngah ber a ni ṭhin a, chu record chu Lionel Messi hian a rawn khum ta a ni.

Messi hian a post siam caption-ah hian an ṭawngin, "Atna mawi tak zawng a va ni em! A awihawm loh hial zawk! Ka lawm e Lalpa! Champion kan ni," tiin a ziak.

Copa America khelh zawh takah khan kum 34 mi Messi hian goal nga a khung a ni. Argentina football team hian kum 1993 aṭang khan international title an la la leh lo a, Copa America final vawi thum lai inpet thlengin, kum 2014 khan World Cup final an inpet thleng bawk a, mahse nomawi erawh an hawn hleithei lo.

Kuminah erawh an tan kum ṭha a rawn inher chhuak ta a, Copa America final-ah Brazil hnehin Copa America nomawi chu an hawn ta a ni.

Messi post hi IG-a post hrim hrimah chuan like ngah parukna a ni a, Billie Eilish-i'n British Vogue tana a thlalak chu pangana a ni. Billie Eilish post tho, a sam buang a tihlanna post chu palina a ni thung a, XXXTentacion-a'n a thih hmaa a post siam hnuhnung ber chu pathumna niin, Ariana Grande-i'n a pasal nena an thlalak a post chu pahnihna a ni thung. Post like ngah ber chu Chris Godfrey 'Artui' thlalak bawk kha a la ni reng.