Bollywood film lar - Padmaavat Tlangzarh kara sum hailut hnem ber

Bollywood star Deepika Padu­kone, Ranveer Singh leh Shahid Kapoor te channa 'Pad­maavat' chuan sum a hailut hnem hle a, tlangzarh aṭanga kar khat lek chhungin $mtd 11.60 zet a lalut. A sum lakluh zat hi Hollywood film lar dangte nena khaikhin pawhin a zahpuiawm loh hle.

Padmaavat hi January 25 khan tlangzarh a ni a, Bollywood film chhuak tawh zinga tlangzarh aṭanga kar khat chhunga sum lalut hnem ber a ni. A sum lakluh hi India pawisa chuan cheng vaibelchhe 124 vel zet a tling! Hei hi kar khat chhunga a lakluh chauh a la ni a, record a siam belh thei angem tih chu hunin a la hril dawn a ni. Kum 2013-a tlangzarh 'Dhoom 3' khan $mtd 10.32 zet la lutin record a lo siam tawh a, hei hi a rawn khum ta a ni. Padmaavat leh Dhoom 3 te chiah hi Bollywood film zinga tlangzarh kara $mtd 10 lalut tling awm chhun an la ni bawk.

Padmaavat hi a lar vet vet hle a, India ram mai bakah khawvel hmun dangah pawh hralh a tla hle. US leh Canada lamah hralh a kal zual a, kar khat chhungin $mtd 4.43 zet la lutin, Bollywood film zinga hetiang zat sum lalut thei hmasa ber a ni bawk. Australia lamah pawh a hit hle a, ni nga chhung lekin $mtd 2 a lalut. Padmaavat hi 3D-in siam a ni bawk a, hei hian sum lakluh kawngah pawh a pui nasa hle.

Bollywood super star Ami­tabh Bachchan chuan Padmaavat hlawhtlinna chan hi ropui a tih thu a sawi a, a changtute pawh lawmpuina a thawn nghe nghe. Amitabh chuan Indian film insdustry hmasawnna hian a tilawm hle tih sawiin, hma sawn zel turin duhsakna a hlan. Ranveer chu a chanpual a hnehsawh em avangin a mimal takin a fak bawk.

Padmaavat-ah hian Deepika chu lalnu Rani Padmavati lemah a chang a, Ranveer Singh leh Shahid Kapoor-te'n mit an la hle bawk. Sanjay Leela Bhansali kutchhuak film hi Bollywood film zinga budget sang ber pawl a ni bawk.

Dodalna a nasa
Padmaavat hian dodalna a tawk nasa hle a, India ram chhung hmun hrang hrangah buaina a chhuah phah. Hindu te chuan nasa takin an sawisel a, lungawi lohna lantirin hmun tam takah kawngzawh an huaihawt a ni. Hmun tam takah poster hal a ni a, buaina chhuak a awm bawk. Padmaavat hi India ram pawnah pawh dodalna a awm a, ram eng emaw zat chuan chhuah an phal lo. Hetih lai hian New Zealand box office-ah chuan sum lalut hnem ber a ni lawi a, dodalna karah pawh sum lakluh zat aṭanga teh chuan film hlawhtling ber zinga chhiar tel a la ni ang.