Billboard Streaming chart-ah Drake-a'n record siam

Canadian rapper Drake chuan Billboard Streaming Songs chart-ah pakhatna a hauh a, kar khat chhunga stream-tu ngah lamah record thar a siam.

Drake hla thar 'God's Plan' chu kar khat chhungin internet lama entu mi maktaduai 68 zet an awm a, stream chart-ah he tiang thleng thei hi an la awm lo. Hei hi US-ah bik chauh a la ni a, khawvel huap anga chhut chuan hei ai hian an la tam zawk fe dawn a ni. Record awm lai chu Kendrick Lamar hla Humble kha niin, he hla hian nikum May thla khan kar khat chhungin entu mi maktaduai 44.4 zet a nei. Hei hi Drake hian a rawn khum chiang hle a, a hla thar hi official-in video a la tichhuak lo zawk a ni. A hla hi audio track chiah en tur a la awm a, heti chung hian a lar vet vet hle a ni.

Drake hian Stream chart-a pakhatna hauh thei hla pa hnih a lo nei tawh a, tuna mi hi a pathumna a ni. Hemi hma hian WizKid leh Kyla te nena an sak One Dance leh Rihanna nena an sak Work te a ni. Amaherawh chu tlangzar kara dinhmun sang ber luah nghal thei erawh God's Plan chauh hi a la ni thung.

Canadian tlangval hi Billboard Hot 100 chart-ah pawh pakhatna a ni a, a hla hi kar khat chhungin Digital Song Sales kaltlangin 127,000 zet hralh a ni. Hei mai hi a la ni lo, U.K. Singles Chart-ah pawh 'God's Plan' hi pakhan a ni mek bawk.