Khawvela ram hausa ber US; India parukna)

Ram ropui sawi apianga rilrua lo lang chu United States of America (USA) a ni a, khawvela ram hausa ber pawh he ram tho hi a ni. New World Wealth report-in a tarlan dan chuan US hi China chuan a dawt a, India chu parukna a ni.

New World Wealth report hi Nilaini khan tlangzarh a ni a, Japan, United Kingdom, Germany, France, Canada, Autralia leh Italy te chu top 10-ah an lang. US hausakna hi $tld 64,584 vela chhut niin, China ($tld 24,803) leh Japan ($tld 19,522) ten an dawt. Ram changkang leh hausa hmasa UK chu palina-ah awmin, a hausakna hi $tld 9,919 a ni. Europe ram dang Germany hausakna chu $tld 9,660 niin, India chuan a dawt. Mihring tam lama a pahnihna ram, India hausakna hi $tld 8,230 niin, US a la pha lo hle. Heti chung hian top 10-a lang France, Canada, Australia leh Italy ramte aiin India dinhmun hi a ṭha zawk.

Khualzinte tlawh tam ram France hausakna chu $tld 6,649 vela chhut niin, pariatna Canada hausakna pawh $tld 6,393 a tling. Australia ($tld 6,142) leh Italy $tld 4,276 te chuan hnu an khar a, ram hausa zual zingah Russian a tel lo.

India dinhmun
New World Wealth report-in a tarlan dan chuan India chu kum 2017 chhunga ram hausa chak chak ber a ni a, a ṭhanna hi 25% lai a ni. India hausakna hi kum 2016 khan $tld 6,584 a ni a, kum khat chhungin $tld 8,230-ah a kaichho hman. India bakah hian China, USA, Japan leh Australia te chu hauskna pung chak zingah an tel. China hausakna hi 22%-in a ṭhang a, India nen a inthlau lo hle. Khawvel pum hausakna pawh 12%-in a ṭhang bawk.

India hi billionaire ngah lamah pawh pathumn a ni phak a, a tluk loh ram te chu US leh China tho an ni. India-ah hian billionaire 119 an awm mek a, multi-millionaire 20,730 awmin, a tam zawkte hi sumdawng an ni.

India hausakna hi kum 10 chhunga a ṭhanna chu 160% zet a ni a, kum 2007-a a hausakna $tld 3,165 chu 2017 a ral meuh chuan $tld 8,230-ah a kaichho a ni.