Mystical Mizoram Ṭhazual Lengzem : Chart topper tura ruat Jt Production 'Khuanu Ruat Loh'

Mystical Mizoram Ṭhazual Lengzem chart-ah Jt Production 'Khuanu Ruat Loh' chu pakhatna a ni ta a, chart-ah a dinhmun a ṭha rei tawh a, tunah phei chuan dinhmun ṭha berah a rawn ding ta a ni.

Chart topper tura ruat 'Khuanu Ruat Loh'
A hla tihchhuah apiang a hit emaw tih mai tur khawpa tunlai zaithiam zinga tla na Jt Production hian March thla tir teah khan 'Khuanu Ruat Loh' hi a tichhuak a, tunah chuan YouTube lamah pawh thlirtu nuai 1.5 chuang an awm leh der tawh.

Jt-a hlate hi a mawiin lungkuai tak a ni ṭhin a, 'Khuanu Ruat Loh' pawh hi chutiang bawk chu ni lehin hla ngaihthlak hahdam leh mawi tak a ni. Music video mawi tak leh hmuh nuam tak nen Jt-a hian he hla hi a tichhuak a ni.

Kumin chu a khat tawkin Jt Production hi chart topper a ni deuh reng a, a zai hi Zofate'n kan ngaihthlak nasat ber zinga mi pawh a ni tih a chiang.

Siampuii Ralte nena an sak 'Ka Hmangaih te' chart topper a nihna aṭanga kan thlah liamna a la rei loa, tunah a hla dang topper a rawn nihpui leh der tawh a ni.

Pahnihna leh Pathumna
Mizo rilrem zawng taka zai ṭhin, R. Lalruatkima hla 'Min Tuahrem Thuai se' chu pahnihna a ni. He hla hi YouTube lamah pawh thlirtu an tam tawh viau a, chart lehah pakhatna a ni phak dawn em tih hriat a chawkawm tawh hle.

Pathumna chu Chama Thangluah & R. Lalhmingmawia 'Min Hruai ve Ang Che' kha a ni a, palina aṭangin pathumnaah a rawn inhlangkai a ni.

Hard Ray, Siampuii leh midangte
Hard Ray 'Ka Hmangaih Che' chu palina niin tunlai zaithiam zinga huhang ngah ber pawl Siampuii Ralte 'Thawnthu Tawp Thei lo Tur' chu top 5 khartu a ni.

Jojo Jongte, Lilzo, Zaii Hauchhum, Mabiaki Pachuau leh Apuii Chhangte te pawh chart-ah an lang bawk.