Space Jam: A New Legacy a Slam Dunk

North America Box Office-ah 'Space Jam: A New Legacy'-in sum a lalut tam ber a, kar hmasaa sum lalut tam ber Black Widow chu sum lalut tam ber dawttu a ni a, Escape Room: Tournament of Champions chu pathumna a ni thung.

'Space Jam: A New Legacy'
Animated sports comedy film 'Space Jam: A New Legacy' hi kum 1996-a tihchhuah 'Space Jam' chhumzawmna kha a ni a, Zirtawpni liamtaah khan US-ah tlangzarhin kar liam ta chhung khan theatre 3,965 aṭangin $31,053,362 lai sum a lalut.

He film hian ram dang aṭangin $22,100,000 a lalut bawk a, khawvel puma a sum lakluh tawh zat chu $53,153,362 a ni.

'Space Jam: A New Legacy' film-ah hian Artificial intelligence-in basketball player lar tak LeBron James fapa an rubo a, chumi avang chuan LeBron James chuan basketball game-a chak turin Bugs Bunny a thawhpui a ngai ta a ni.

LeBron James hi he film-ah hian a inlan tak tak a, Don Cheadle, Khris Davis, Sonequa Martin-Green, leh Cedric Joe-te nen chang hoin Looney Tunes ho ah chuan Jeff Bergman, Eric Bauza, leh Zendaya-te'n an aw an thawh thung.

Black Widow sum lakluh a tam tawh
Marvel Cinematic Universe phase 4 film hmasa ber 'Black Widow' chu Box Office-ah sum lalut tam ber ni zo tawh lo mah se khawvel puma a sum lakluh tawh zat erawh a tam turu tawh hle a, $mtd 264 chuang a lalut der tawh.

Kar tawp liam taah khan North America Box Office-ah chuan theatre 4,275 laiah chhuah a ni leh a, chung aṭang chuan $25,847,496 lai a lalut leh a ni.

'F9: The Fast Saga' chu palina a ni a, $7,673,715 lai sum a lalut leh.

Top 10-ah film thar a tam
Pathumna 'Escape Room: Tournament of Champions' chu film thar tho a ni a, he film hi psychological horror film a ni thung. Kum 2019-a tihchhuah 'Escape Room' chhunzawmna kha a ni a, Taylor Russell leh Logan Miller-te chuan an role ngai an chang leh a ni.

Film tlangzarh thar zinga mi 'Roadrunner: A Film About Anthony Bourdain' chu sum lalut tam pariatna a ni bawk a, 'Pig' chu top 10 khartu a ni bawk.