Mark Hoppus : A dinhmun a ṭha?
Blink-182 bassist Mark Hoppus chuan Thawhṭanni khan a damloh chungchanga thu lawmawm lam a rawn chhawp chhuak a, chemotherapy treatment a lak mek chuan awmzia a nei chho hle tih a sawi.
June thla tawp lama a cancer thu sawi chhuaktu Mark Hoppus chuan Thawṭanni khan Twitter-ah,"Scan aṭanga a lan dan chuan chemo lak chuan a thawh tur ang a thawk! Thla eng emaw zat chu treatment ka lak a la ngai dawn a, mahse tunah chuan chanchin hriat theih duhawm ber a ni rih.
"Ka lawm rualin ka rilru erawh a buai hle a, kar hmasa khan chemo vangin ka awm a nuam lo hle bawk. Mahse ka taksaa doctor-te'n tur an thun leh ka chhehvela mite'n ka ṭhat leh an duhna chuan cancer hi an tichhe mek a ni. Ka do zel dawn...," tiin a tweet.
Blink-182 singer leh bassist ni bawk hian a cancer thu a puanzar aṭang khan a khat tawkin social media lamah a fan-te tan a chanchin a tarlang ṭhin a, chemo hi thla thum chhung khai a ngaih thute pawh a lo tarlang tawh a ni.
Kum 49 mi Hoppus hian thla tir lamah khan a follower-te chu a eng lam zawnga thil an thlirpui avangin lawmthu a hrilh tawh a, a nuin a lo hneh tawh, thisen lam kaihhnawih cancer bawk a nei tih sawiin cancer hneh hlan a nghakhlel tawh hle tihte pawh a lo sawi tawh bawk.