September 3-ah Iron Maiden album thar

English heavy metal band Iron Maiden chuan an album thar 'Senjutsu' chu Septem­ber 3-ah an tlangzarh dawn tih an puang.

'Senjutsu' hi an studio album 17-na tur a ni tawh a, tracklisting-te pawh an tichhuak tawh a ni.

'Run to the Hills' rockers – Bruce Dickinson, Steve Harris, Dave Murray, Adrian Smith, Nicko McBrain leh Janick Gers-te chuan kum ruk lai liam hnua an album hmasa ber tur hi Paris-ah an producer ni reng ṭhin Kevin Shirley hoin an record a, Harris chu co-producer a ni bawk.

Kar hmasa khan he album aṭanga an single hmasa ber 'The Writing On The Wall' chu an tichhuak tawh a ni.

'Senjutsu' hi 'tactics & strategy' tihna a ni deuh ber a, an album cover artwork chu Mark Wilkinson siam niin Samurai theme a ni a, Harris-a idea a ni awm e.

Dickinson chuan,"He album tichhuak tur hian kan zavaiin kan phur tawh hle. Kum 2019 kum tir lama Leagcy tour kan chawlh zuai laia kan record kha a ni," tiin an phur tawh thu a sawi.

Iron Maiden hian kum 1980 khan an album hmasa ber 'Iron Maiden' an tichhuak daih tawh a, studio album 16 lai an tihchhuah tawh bakah live album pawh 13 lai tichhuak tawhin EP pali an tichhuak tawh bawk.

'Senjutsu'-a hla awm turte:-
1. Senjutsu
2. Stratego
3. The Writing On The Wall
4. Lost In A Lost World
5. Days Of Future Past
6. The Time Machine
7. Darkest Hour
8. Death Of The Celts
9. The Parchment
10. Hell On Earth