Human Trafficking film 'Where' shoot zawh a ni ta : Tun thla chhungin tihchhuah hman beisei

Mihring hmanga sum dawnna lam hawia Mizo film siam mek 'Where' chu shooting zawh fel a ni tawh a, tun thla tawp lam hian tihchhuah hman beisei a ni.

He film hi Mizoram Thalai Kristian Pawl (MTKP)-te'n an buatsaih niin, mihring hmanga sumdawnna chungchanga inzirtirna a ni. Thil thleng tak tak (True Story) behchhan a siam niin, phaia hnathawk tura inbumchhuahna thleng chanchin tarlanna a ni. Mihring hmanga sumdawngten hnathawk tura mi an bumchhuah dan leh, chung miten harsatna an tawh nasa zia tih lan a ni. A thwnthuah hian sum tam zawk thawk chhuak thei tur anga thlem a, hmeichhia an bum luh dan chi dang pawh a tel a ni.

A changtute pawh mi hriat hlawh tak tak an ni dawn a, zaithiam Bethsy Lalrinsangi leh Rosy K. Remsangpuii bakah, Mapuia Chongthu (Leitlang Pictures)-te pawh an inlan dawn a ni. Mipuiten kan la hmelhriat sa lem loh, Vanlalpeki Ralte leh Lalduhsaki Sailo te chu a changtu tur ber an ni a, anni hi, phai lama harsatna tawk lemah an chang dawn a ni.

Script writer hi B. Lalbiakvela niin, a ni hi film director a ni nghal bawk. Shooting hi Lunglei leh Guwahati lamah neih niin, F. Malsawmkima (Mspace) chuan video hi a khawih a ni. Film-a changtute pawh hi uluk taka thlan an ni a, action pawh a ang thei ang ber tura tih a ni. A buatsaihtute chuan mite hnenah a tam thei ang ber zirtirna pek a, harsatna tawkte pawhin an ṭangkaipui ngei an beisei tih an sawi.

Mizo film chhuak thar tur 'Where' hi pawl leh mimal tan sum tuak nan a hman theih dawn bawk.