Super Bowl 2018 Halftime show-ah Justin Timberlake che pui

American football game ngaihlut hlawh National Football League (NFL) championship chu an ram huna Pathianni zan khan khelh a ni leh ta a, halftime show-ah American singer Justin Timberlake a che pui hle.

Super Bowl LII hi US Bank Stadium, Minneapolis-ah khelh a ni a, Philadelphia Eagles chuan New England Patriots chu 41-33 a hnehin an champion a ni. Entertaiment huanga show ngaihlut hlawh ber tih ngam chu Super Bowl halftime show niin, United States-a show entu ngah ber pawh a ni. Chawhrualin mi maktaduai 100 chuangin an thlir ziah anga chhut a ni. He show-a inlan hi zaithiamte chak ber pawh a ni. Kumin bikah hian Justin Timberlake chu mi mit fukna ber niin, a perform pawh a hmuhawm hle. Pink chuan National Anthem a sa a, lawm a hlawh viau bawk.

Timberlake show
NFL final en turin mipui ṭhahnem tak an pungkhawm a, American football game ngainatu leh Timberlake show en chaka pungkhawm an ni. Timberlake hun a thleng a, mipui hmuhchak a thleng zui. American singger hian a hla thulkhung Cry Me A River, Suit & Tie, SexyBack, Senorita, Mirrors leh My Love te a sa a, mipui thawm a ring kher mai. Can't Stop The Feeling leh Filthy leh Man of the Woods albuma a hla ṭhenkhat a sa zui a, entu lam an awm hle hle thei lo. Minneapolis khawchhuak Prince hriatreng nan a hla hit I Would Die 4 U a sa bawk a, hetih lai hian Prince sulhnu leh hlimthlate chu projector hmangin tihlan a ni.

Timberlake chuan, "He huna ka inlan dawn tih ka hriat khan ka rilruah Prince a lo lang a, a ni puala hun hman kha he khawpui leh a chhunga chengte tana ka tih ve theih chhun a ni tih ka hria a ni" tiin, kum 2016-a boral Prince chu a ngaihsan thu a sawi. Mi ṭha tak leh music khawvela hriatzui reng tawh tur mi a nih thu a sawi bawk.

Timberlake hi he show ngaihhlut hlawhah hian ṭum ṭhum a inlanna chiah a ni a, kum 2001 leh 2004 khan a lo inlan tawh. Aerosmith, Britney Spears, Mary J. Blige leh Nelly te nen an lo inlan ho tawh a, Janet Jackson nen Rock Your Body an sa dun tawh bawk.

Social Media reaction
Super Bowl Halftime Show entu an ṭhahnem a, a game bakah show hrim hrimin sawizui a hlawh hle. Timberlake perform chu social media lama khelzui hlawh ber a ni a, titi pawh a tam hle. A zai ngaintute mit a tlung viau niin a lang a, faktu pawh a ngah hle. A hla hit hrang hrang a lawrkhawm vangin fak a phu ti tawk an awm a, a perform hmuhnawm titu lah an bo lo. Heti chung hian Prince hla a cover chungchangah erawh sawisel tawk an awm a, a kuang lo nawrah an puh. Prince fan ruhkawlten an duh khawp an hmu lo a, Timberlake hian Minnesota legend nihna leh ropuina a pawchhuak zo lo an ti! A lamṭangte chuan a tih tur dik tak a ti a ni an ti a, an ṭan ve tlat bawk.

Show reaction pawh a chhe lam leh ṭha lam hmuh tur a tam a, TV aṭanga lo entute tan a hmuhnawm viau laiina hmuna awm ten stage an hlat lutuk tipawl an awm bawk. Sound system a ṭha a, chutih rual chuan Timberlake perform laiin a ri a zawi deuh niin an sawi. Stadium-ah hian mi 70,000 vel an pungkhawm a, thawm bengchheng dang a tam avangin zai ri hre pha mumal lo an awm te pawh a ni ang.

Kum tina khelh ṭhin NFL championship entu zingah khawvel huapa mi lar tak tak an kat nuk a, chung zingah chuan Jennifer Lopez, Bradley Cooper, leh boxer Floyd Mayweather te pawh an tel. Anni bakah hian milar eng emaw zatin a hmunah show hi an en bawk. Nikum khan halftime show-ah hian Lady Gaga a perform a, TV kaltlanga lo entu hi mi maktaduai 117.5 vel zet an awm a ni.