Spice Girls Reunion a hnai?

English pop girl group Spice Girls chu hun eng emaw chen an kehdarh hnuah an intuaithar leh dawn hnai niin thu a thang mek.

Kum 1994-a din Spice Girls-ah hian member panga - Melanie Brown, Melanie Chisholm, Emma Bunton, Geri Halliwell leh Victoria Beckham te an awm a, an hun lai chuan an lar vet vet hle. Member te hi Geri Halliwell chenna Hertfordshire, England-ah tun hnai khan an inhmukhawm a, reunion te pawh an sawi ri a ni. Kumin chhungin inzawmkhawm leh an duh tih an sawi a, fan-te tan chuan lawmna tur a ni phawt. Mahse a thleng ngei dawn em tih erawh hriat a ni rih lo.

Hetih rual hian February 2 khan an thlalak tharlam tak chu social media lamah an tidarh a, reunion neih an tum thu pawh an tarlang. Hemi chungchang hi Victoria Beckham pawhin a sawi lang a, thil thleng thei a nih thu a sawi. Spice Girls hian 2007-08 khan reunion tour an lo nei tawh a, kuminah hian eng emaw tak chu a huhoa tih leh an tum a ni.