Hontrade Ṭhazual Lengzem-ah Zomuanpuia leh Thanzami-te an langsar

Hontrade Ṭhazual Leng­zemah F. Zomuanpuia leh HT Lalthanzami te sak, 'Hmangaih Mengmawite' tih hla chu thlan hlawh ber a ni mek a, a zawnin pakhatna dinhmun an luah. Zomuanpuia leh Thanzami te hi top 10-ah an lang ve ve bawk a, mimala langsar an ni.

Mapuii Fanai hla phuah 'Hmangaih Mengmawite' tih hi sak lar a lo ni tawh a, nikum khan Zomuanpuia leh Thanzami te hian music video siamin an rawn sa lar thar leh a ni. Tunah hian Lengzem bikah chuan thlan hlawh ber niin, chart-ah pawh kan hmu zui zelin a rinawm. Tun ṭum chart-a pahnihna chu Kimkima a ni a, a hla hit 'Sarah I zunzam' tih chuan mipui rilru a la hneh tih a hriat. Kimkima hian he hla hmang hian dinhmun sang ber a lo luah tawh a, chart a chhuahsan tak tak thei rih lo. A hla lungkuai tak hian ngaithlatute rilru a hneh a, thlan hlawh ber pawl a nih zel a rinawm. Pathumna chu Thanzami a ni a, a ni pawh hian hma lam a pan hret hret. A hla 'Ka hmangaih che asin' tih hi Mizote rilrem zawng tak a ni. A ni ang bawk hian Zomuanpuia chu 'Lung a leng e mai' tih hla hmaning top 10-ah a hmel kan hmu a, pasarihna a ni.

Jenny Jathang chuan 'I hlui thei mawlh lo' tih hla hmangin palina a hauh a, pangana chu PUC Various Artists an ni. PUC zirlaite hian 'Zoram rohlu PUC' tih hla hmang hian a ber nihna an lo hauh ve tawh bawk a, a sang 10 zingah an tel rei ta hle. Top 10-ah hian hmelthar H Lalvulmawia, Janet, Richard Chawngthu leh Isaac Khawlhringte an lang bawk.