Amy Grant lung an zai

Contemporary Christian singer Amy Grant chu Nilaini khan a lung an zai. 

Amy Grant hian a pian hlim aṭangin a lung lama harsatna a neih tawh chu a zaitir niin an sawi.

A aiawha a thu puangtu chuan hemi chungchang hi tarlangin a routine check-up-ah doctor-te chuan a lungah harsatna 'partial anomalous pulmonary venous' a nei tih an hmu chhuak tih leh zaia a ṭhat leh mai an beisei thu an sawi a ni, a ti.

Grant hi kum 59 lai a ni ve tawh a, country singer leh Eagles member Vince Gill nen kum 20 vel innei tawhin Grammy pawh paruk lai a dawng tawh a ni. Album pawh copy maktaduai 30 chuang hralh tawhin, kum 1991-a tihchhuah 'Heart in Motion' phei chu '5-times platinum' a ni hial.

Kumin February khan a lung lamah fel lohna a awm tih hriat chhuak chauh a ni.

'The Queen of Christian Pop' tia an sawi hial ṭhin Amy Grant hian Gospel Music Association Dove Awards pawh 22 lai a dawng tawh a, Christian Album Plantinum kaipui thei hmasa ber a ni bawk.

Kum 2006 khan Hollywood Walk of Fame-ah lakluh ni tawh bawkin,  Billboard Hot 100-a No.1 nihpui zak zak thei hla lo nei tawh ṭhin a ni.

Album 20 chuang a ti­chhuak tawh a, Gospel music huangchhung bakah mainstream pop-ah pawh hming a chher hle a, Gospel singer lar Michael W. Smith nen pawh an zai dun fo a ni.