Live music leh Rock and Roll hi a bo hlen dawn lo: Taylor Momsen

The Pretty Reckless frontwoman Taylor Momsen chuan hripui leng karah live show neih harsa hle mah se live music leh Rock and Roll chu a bo hlen dawn lo tih a sawi.

100.3 The X Rocks radio personality Big J-in a kawmnaah hemi chungchang hi sawiin tun hun hi hun mak tak a ni, a ti. "Sawi tur pawh ka hre lo zawk. Tunah hian a nihna takah chuan tour nei mek tur kan ni a, kan career-a touring line up kan neih ṭhat ber ṭum pawh a ni. Kum thum chhung ka inkhung hran hnuah khawvela let leh turin ka inpeih a, a phur pawh ka phur tawh hle," tia sawiin tunah chuan engmah a tih theih rih ta si lo a, dawhtheihna ngah a ngai hle a ni, a ti.

Mahse ka hriat chu live music leh rock and roll hi a bo hlen dawn lo tih hi, a theih loh a ni, tia sawiin, mipui leh musician-te an la mamawh tih a sawi.

The Pretty Reckless hian hun eng emaw chen thawm an neih loh hnuah kuminah thawm an rawn nei thar leh a, tour neih tuma hma an lak mek laiin hripui leng vangin an hmachhawp hrang hrang chu an kaltlangpui leh thei ta rih lo a ni.

Hetihlai hian album thar erawh tihchhuah an tum a, an album thar tur hi 'Death By Rock And Roll' tih a ni dawn a, hetah hian Rage Against The Machine 'Tom Morello' pawh an thawhpui tih an lo tarlang tawh bawk.