Box Office : Jumanji-in Titanic record nih rual

Jumanji: Welcome to the Jungle chuan Titanic record lo siam tawh chu nih rualin, US bikah December thlaa film tlangzarh zinga, February thlaa sum lalut hnem ber luah thei pahnihna chiah a ni. Jumanji hian kar liam ta chhung khan $mtd 11 la lut lehin, North American box office-ah pakhatna a ni.

Kum 1997 khan khawvela film lar ber pawl Titanic chu tlangzarh a ni a, hun rei lote chhungin kiltin a dengchhuak a ni ber. Mizoramah pawh kan lo en ve a, sum a lakluh tam zia thlengin kan hria. He film lar tak hi Japan-ah chuan Tokyo International Film Festival-ah tlangzarh a ni a, November thla chhung vekin UK-ah tlangzarh a ni. Hetih lai hian North America-ah chuan December 14-ah tlangzarh a ni a, kum thar Febuary thla thlengin Box Office-ah sum laluh hnem ber a ni. He a record duhawm tak hi kum 20 hnuah adventure film 'Jumanji: Welcome to the Jungle' chuan a rawn nih rual ve ta a ni.

Jumanji ni nikum December 20 khan tlangzarh a ni a, sum lakluh tam lamah a chungnung nghla hle. Dwayne "The Rock" Johnson channa film hian Super Bowl weekend-ah pawh sum lalut tam ber a la ni. Jack Black, Kevin Hart, Karen Gillan leh Nick Jonas-te channa hi Theater 3,352-ah chhuah a ni tawh a, heta ṭanga a um lakluh hi $mtd 352.6 a ni. A sum lakluh tawh zawng zawng chu $mtd 824.8 zet a ni. Tun

ṭum Box Office-ah hian kumina film tlangzarh eng emaw zat a awm nual a, chung zingah chuan Maze Runner: The Death Cure pawh a tel. Maze Runner hian kar liam ta chhung khan $mtd 10.2 lalutin, sum lalut tam pahnihna a ni. Dylan O'Brien channa film hi January 17 khan tlangzarh a ni. Sum lalut tam pathumna chu tun thla tira tlangzarh 'Winchester' niin, a sum lakluh zat chu $tld 9.3 a ni. Sum lalut tam zual zingah The Greatest Showman pawh tel lehin, kar khat chhungin $tld 7.8 a la thawk chhuak.

Top 10-ah hian The Shape of Water leh Paddington 2 pawh lang lehin, hun eng emaw chen chu Box Office-ah hmun pawimawh an luah ta a ni.