Indian Box Office : Dodalnain Padmaavat sum lakluh dal zo lo

Bollywood film lar Padmaa­vat chuan dodalna tam tak tawk mah se, sum lakluh lamah chuan harsatna a tawh pha chuang lo. Indian Box Office-ah pakhatna a ni a, dodalna chu a ropuina belhchhahtu mai a ni.

Padmaavat hi January 25 khan tlangzarh a ni a, kar hnih chhunga a sum lak luh zat chu cheng vaibelchhe 200 chuang a ni hem mai. Bollywood star lar rual - Ranveer Singh, Deepika Padukone leh Shahid Kapoor-te channa film hian kar khat chhungin vaibelchhe 100 a la lut hman a, ni 13 a ral meuh chuan vaibelchhe 250 a la lut tling hman. Padmaavat hi sawinep chi rual a ni lo a, record a siam chho mawlh mawlh a ni ber.

Record chu

Padmaavat hi Bollywood film chhuak tawh zing a kar khat chhunga sum lalut hnem ber a ni. Indian film zinga North American Box Office-a tlangzarh kara sum hailut hnem ber a ni bawk. US Box Office-ah hian kar khat chhungin $mtd 11.60 a lalut a, Bollywood film zingah hetiang zat la lut thei hmasa ber a ni.

Hindi film chhuak tawh zinga budget sang ber niin, a siam nan hian vaibelchhe 250 sen ral a ni. Indian film chhuak tawh zinga budget sang ber a ni bawk. Record hrang hrang a siam nual a, Bollywood film zinga IMAX 3D tihchhuah hmasak ber a ni bawk.

Dodalna karah
Padmaavat hian dodalna a tawk nasa hle a, India ram mai bakah ram pawn thlengin dodalna a tawk a ni. Hindu-te chu a duh lo langsar an ni a, an mi leh sa te chuan lungawi lohna lantirin hmun tam takah kawngzawh an huaihawt a ni. Hmun tam takah poster hal a ni a, buaina chhuak a awm bawk. Padmaavat hi tlangzarh anih hma hauh aṭangin sawisel a nasa a, tlangzarh hun tura ruat lawk pawh sawn a ngaih phah hial. Nikum December 1 khan tlangzarh tum a ni a, January thlaah tlangzarh a ni ta chauh a ni.

Film director Sanjay Leela Bhansali lakah pawh thupuia thehluh niin, Court-ah khin a ni. Hetih lai hian Rajasthan High Court chuan Bhansali hian tihdik lo leh, thiam lohnna a neih loh thu a sawi. Central Board of Film Certification chuan mipui hmuh theiha him tawk lo a awm nia sawiin, scene ṭhenkhat chu siam ṭhat leh turin a hriattir bawk.

Dodalna leh sawiselna tam tak karah Padmaavat hi tlangzarh niin, 2D, 3D leh IMAX 3D for­mat-a tihchhuah a ni.