Hla thar nen Backstreet Boys

American vocal group Back­street Boys chuan hla thar nen an lo kir leh dawn tih an sawi.

Backstreet Boys hian Thawhlehni khan Los Angeles-a Twitter headquarters an tlawh a, chanchin lawmawm lam an nei zui. BSB hian hla thar nen an lo kir thuai dawn tih an sawi a, July-November thla chhung hian tour an nei dawn bawk. Group member Kevin Richardson chuan, "Hla thar nen kan lo kir leh dawn a, a rei tawh lo ang. A hnai tawh tak zet mai thei" tiin, hla thar an tichhuak hnai hle tih a sawi. Hetih rual hian an tihchhuah hun tur leh, an hla title tur erawh a sawi lang lo.

BSB hian an album 10-na tur an buaipui mek thu an lo puang tawh bawk a, kumin chhunga tihchhuah tur a ni ang. Kum 1993-a din BSB hian K-pop lam an ngaina a ni chek ang a, fan-te zawhna an chhanaah South Korean boy Band BTS fan an nih thu an sawi mauh mai. An member Nick Carter chuan BTS hi BSB nen pawh a inzul viau a, khawvela band lar ber pawl ni mek hi an ngaihsanawm hle a ni, a ti.