Nagaland assembly aṭangin NPF MLA 2 leh Independent 6 bang

Nagaland-a rorel lai Naga People's Front (NPF) MLA pahnih chuan Nagaland Assem­bly mem­ber an nihna aṭanga an ban thu an sawi. Anni bakah hian Independent MLA paruk pawh an bang bawk.

Thawhṭanni zana Naga­land Commissioner leh Secretary ni bawk N Benjamin Newmai thu­chhuah chuan NPL MLA pahnih bakah Independent MLA paruk te chu Assembly mem­ber an nihna aṭanga an ban thu sawiin Nagaland Speaker Imtiwa­pang Aier pawhin an banna hi a pawmpui tawh thu a tarlang.

NPL MLA bang zinga pakhat zawk hi Minister for Roads and Bridges, G Kaito Aye a ni a, pakhat zawk hi MLA Neiphrezo Keditsu a ni thung. Kaito hian JD(U) a zawm nghal bawk a ni.

Nagaland inthlan turah hian JD(U) hian candidate 11 an neih dawn thu an puang tawh a, BJP pawhin Democratic Alliance of Nagaland (DAN) chhuahsanin National Democratic Political Party (NDPP) nen thawhhona tur thutlukna an siam tawh bawk.

Independent MLA bang ta te hi Y M Yolow, Toyang Chang­kong Chang, Picto, S Chuba Longkumar, Levi Rengma leh Amenba Yaden-te an ni a, Levi Rengma, Parliamentary Secretary for PWD (Housing) tih loh midang panga te hian NPF an zawm thung a, NPF hming hian inthlanah pawh an ding dawn a ni.

NPF hian Thawhṭanni khan an candidate tur hming 58 an tarlang tawh a, heng zingah hian Chief Minister ni lai TR Zeliang pawh a tel a ni. Hetih lai hian NPF President Dr Shurhozelie, MLA ni bawk hming erawh inthlannaa candidate turah hian a tel lo thung. Shurhozelie aiawh hian a fapa Khriehu Liezietsu chu Northern Angami-I-ah a ding dawn thung a ni.

Seat 60 awmna Nagaland Assembly inthlan hi February 27-a neih tur niin, March 3-ah vote chhiar a ni ang.