Musician uiawm A7X drummer 'The Rev' mawlh kha
Khawvelin kum zabi thar a kai a, music khawvel pawhin bung thar a kai tih loh rual a ni lo a. Kum zabi 20-na chawhnu lam aṭanga a tawp lam thlenga khawvelin a rimawi ngaihthlak tam ber chu rock (rock and roll aṭanga heavy metal huamin) music a ni. Mahse kum 21-na kan chuangkai dawn leh kan chuan kai lai vel khan pop music-in khawvel a run a, mi tam berin kan thlekpui dual dual chu phat rual lohin Britney Spears, Backstreet Boys leh Eminem-te ho kha an ni a, khang hunlaia ṭhalai tam berte rilruah khan rock music, a bikin heavy metal chu a tlana tawh lo hle, phat rual a ni lo.
Rock music lamah chuan Nu-metal leh punk rock lam khan bu a khuar nasa a, heavy metal kan tih ang tak tak play-tu band pawh an tam lo hle a, lar vut pawh an awm lem lo ti ila kan sawi sual tam awm lo e.
Chung hunlai, heavy metal band-in ngaihlut a hlawlh lo chho riaua a lan lai tak chuan Huntington Beach, California lam aṭ-anga heavy metal band tuai thar tir tak chuan 'Avenged Sevenfold' tia hming invuahin khawvel an rawn al ṭan a, ṭhalai heavy metal music-a tuite bukpui theih tur music chu an rawn phawrh leh a, an band member an lo hleitlingin an hmelin a zir hlawm bawk nen nula lam pawhin an bawr viau.
Album an tihchhuah pawh a hlawhtling hlawm hle a, kum 2007-a an album tihchhuah 'Avenged Sevenfold' phei chu RIAA Gold certify a ni hial a, khawvela rock band hlawhtling ber zingah chhiar tel loh rual an ni ta lo. Mahse chu chu an drummer chhuanvawr hoa an album tihchhuah tawp ber tur a ni tih reng an hre lo.
An vul lai takin par pakhat thliahin a awm
A7X band innghahna bulpui ber pakhat chu an drummer James Owen Sullivan kha a ni. Ṭhangthar music lama tui tam tak, Mizo-te zingah pawh khang hunlai kha chuan drummer ṭha bera ngai kha an awm ve nawk hman. Chutiang khawpa drummer hming chher chak ni si chu a vul laini a rei lo a, December 28, 2008 khan Huntington Beach-a a chenna inah nikhaw hre loa chhar a ni a, damdawi-in panpui a nih hnuah a thih thu puan a ni a, khawvela drummer hming chher chak ber zinga mi ni mek chu kum 28 mi lek niin lei hnuaiah zalh a ngai ta a ni.
Khang hunlai khan Mizo ṭhalaite zingah pawh Facebook pro-name-a 'Sullivan' tih hming telh an awm nual kha.
The Rev thih hnu lawk khan 'drums legend Mike Portnoy' khan hun eng emaw chen tour puiin album-te hian siampui mah se mi tam tak bengah chuan A7X genre kha a vaw chhuak zo lo a, The Rev a thlak zo lo titu an tam.
Ruihhlo vang bawk maw
Ruihhlo vanga talbuai milar tam tak an awm a, chung zingah chuan The Rev pawh hia tel. A thih tirhah khan police-te chuan a thih chhan kha 'natural cause' tiin puang phawt mah se autopsy aṭanga a lan dan chuan zu leh ruihhlo overdose a ni tlat. Ruihhlo vangin ṭhangthar musician ropui, nakin lawka tunlaia kan ṭawngkam uar em em 'legend' la ni thei tur kha kum 2008 khan a fam ta a ni.
A7X tana mi ṭangkai Sullivan
The Rev hi A7X tan hian a ṭangkai em em a, an band dintu zinga mi hi niin M. Shadows leh an bassist hmasa ber Matt Wendt-te nen an din a ni. Lead guitarist Synyster Gates nen 'best friend' an ni nghe nghe a, an documentary leh video clip hrang hrang en ṭhinte chuan an band chawk hlimtu ber pawh a ni tih an hre ngei ang.
Hla phuahtu pawimawh tak a ni a, 'Afterlife', 'A Little Piece of Heaven', leh 'Almost Easy'-te kha a hla phuah langsar zual niin a thih hnua A7X album tihchhuah hmasa ber Nightmare album-a 'Fiction' kha a thih hma ni thuma a phuah zawh a ni.
Eng nge an sawi?
Drummer ka nihna angin ka sawi ang,
Jimmy kha mi tam tak aiin a thiam a ni
- Atreyu drummer Brandon Saller
Jimmy kha drums vaw tura piang a ni
- Matt Tuck, Bullet For My Valentine
Drummer ṭha tak, phur taka play ṭhin, rilru leh thlarau zawng zawnga play ṭhin a ni
- Vinnie Paul, Pantera
Drummer ropui 'The Rev'
• Revolver Golden God Awards vawi hnihnaah Best Drummer award a dawng.
• Ultimate Guitar online readers' poll-a 'Top Ten Greatest Drummers of All Time'-ah pawh lang phakin pariatna a ni.
• Ultimate Guitar list-a Top 25 Greatest Singing Drummer-ah lang phakin pangana a ni bawk.
• Online rock magazine lar ber pawl Loudwire Top 66 Hard Rock + Metal Drummers of All Time-ah pawh langin 40-na a ni phak. A hnuaiah hian a drummer ngaihsan Tommy Lee leh Lars Ulrich-te pawh an awm a ni.
• Drummer a nih piah lamah hian a zaithiam bawk tih chu A7X fan-te chuan an hre ṭheuh awm e. Pianist ṭha tak ni bawkin an hla eng emaw zatah a piano play record a ni bawk.