Mahni rocket ngeia van boruaka inkap chhuak Jeff Bezos

Khawvela mi hausa ber E-commerce company Amazon dintu Jeff Bezos chu Thawhlehni khan ama company Blue Origin rocket siam ngei hmangin van boruakah a inkap chhuak a, minute rei lote hnuah khawvelah an rawn let lehnghal a ni.

Rocket-a New Shepard capsule-ah chuan mi pali an chuang a, aviator hmeichhia Wally Funk, Bezos-a unaupa leh kum 19 leka upa Dutchman Oliver Daemen-te an chuang ve bawk.

Bezos-a ruala vana inkap chhuakte hi an chhinchhiah tlak hle. Wally Funk hi van boruaka inkap chhuak tawh zinga upa ber a ni nghal a, Oliber Daemen hi naupang ber a ni nghal thung.

Rocket hi Van Horn, Taxas bul aṭangin an kap chhuak a, van boruak aṭangin minute 10 leh second 10 hnuah khawvel lamah a let lehnghal a ni.

An inkah chhuah aṭanga minute hnih hnuah capsule leh rocket chu an inṭhen hrang a, Karma Line lam panin hei hi km 100 vela sanga awm a ni a, chumi an thlen hnu chuan Texas khawthlang lama thlalerah an capsule hmang chuan leilung an thleng leh ta a ni.

Khawvela an thlen leh hnua thuthar thehdarhtue'n an kawmnaah Bezos chuan,"Ka beisei a sang hle a, mahse ka beisei aia ṭha a ni," tiin a sawi.