Billboard: Justin Bieber, i naupanna tumahin ngainep suh se

Justin Bieber chuan The Kid LAROI nena an hla thar 'Stay' hmangin record ropui tak a siam thar a, solo artist zingah Billboard Hot 100 chart-a hla vawi 100 lanpui thei naupang ber a ni.

Drake record khumtu Bieber
Canadian singer Pu Justin Bieber-a ni ve ta hian, kum 2009 khan kum 15 mi lek a nih laiin 'One Time' hmangin tuna a record ropui siam tur hian bul a rawn ṭan a, 'One Time' kha Billboard Hot 100 chart-a a lanpui hmasak ber a ni.

Chutichuan, kum 2021 a lo inher chhuah meuh chuan chu chart-ah chuan a hlate vawi 100 lai a inlanpui ta a, kum 27 mi lek ni chungin chu lungphum khum har tawh tak tur chu a rawn khum ta.

The Kid LAROI nena an hla hi tunkar Hot 100 chart-ah pathumna a ni.

Kum 2015-ah khan Canadian singer tho Drake chuan kum 28 leh thla 11 mi niin Justin Bieber-a record siam thar ang hi a lo siam tawh a, Drake hian Lil Wayne record a khum thung.

Drake erawh Billboard Hot 100 chart-a hla lanpui hnem ber a ni tawh thung a, hla 235 lai a lanpui tawh. Justin Bieber erawh hi chu 11-na a ni pha chiah thung a ni. Chutih rual erawh chuan Bieber-a tluk lohte hi an hrawl viau mai. Elivis Presley, Taylor Swift, Kanye West leh Chris Brown tih vel an ni nawk a ni.

BTS kan ziak lang leh dawn, hmaih chi an ni lo
ARMY lo tan chuan an chanchin chhiar pawh hi a phurawm tawh lo hial mai thei! Mahse rimawi khawvelah an huhang a na miau a, fan base an nei ṭha a, hla an nei mawi ṭhin bawk si a, chart-a che ṭha ber nih mai loh hi chu an tan tihtur dang a awm si lo a ni.

The Hot 100 chart-a pakhatna ni mek chu BTS bawk an ni leh a, an hla thar mawi tak mai, 'Permission To Dance' chu pakhatna an rawn nihpui lehnghal. Butter pawh khan pasarihnaah a la awm vang mai.

'Permission To Dance' mawi zia i hriat duh chuan ngaithla ve chhin mai rawh. the Hot 100 chart topper a rawn ni hi mak i ti lo ang. Billboard Global 200 leh Billboard Global Excl US chart-ah pawh pakhatna a ni mek bawk.

BTS hi tunah hian Artist 100 chart-ah pakhatnaah an rawn inhlangkai ve leh ta bawk a, an hla 'Butter' kha Songs of the Summer chart-ah hmahruaitu ber a la ni lehzel bawk nen, hla thar an tihchhuah chhung chu an chanchin hi ziahlan a ngai dawn niin a lang.

Olivia Rodrigo, heipawh a naupanna ngaihnep chi a ni lo
American Tleirawl zaithiam Olivia Rodrigo pawh a tla na zel a, tunah hian a album 'Sour' chu a vawi lina atan Billboard 200 chart-ah pakhatna a ni leh.

Billboard-a article an ziah velah pawh 'Eng ang takin nge Olivia Rodrigo Grammy Night a ropui dawn?' tih vel chu an ziah duhdan a ni ṭan tawh a, Rodrigo lakah hian rimawi lama tuite'n beisei an nei sang viau a ni.

A hla 'Good 4 U' kha a la hit reng a, Billbord chart hrang hrangah pakhatna em a hauh loh pawhin pahnihna a la ni phak fur a, US mipuite chuan he hla hi an la ngaithla nasa hle a ni.

Artist 100 chart-ah BTS a tluk zo ta lo thung a, pahnihna a ni mek bawk. A album 'Sour' hian kar hmasa lam ai chuan equivalent album unit 5%-in a hmu chhuak tlem a, chuti chung chuan 83,000 EAU a la hmu phak tho.