IG-ah Jenner-i'n Beyonce khum

Tunlai khawvelah chuan milarte chanchin hi social media lama chaw tui ber pakhat a ni zel tawh a, awlsam takin raipuar aṭanga fa nei thar thlengin a hriat zung zung theih tawh. Tunah pawh social media lama lar tak pakhat chu instagram lama Kylie Jenner naute thlalak post a ni a, like-tu ngah ber record a siam der.

IG-a thlalak post tawh zingah Beyonce Knowles raipuar lai thlalakin like-tu a ngah ber a, mahse hei hi Jenner hian a rawn khum ta a ni. American model hian tun hnai khan fa pakhatna a hring a, a thlalak chu Thawhlehni khan IG-ah hian a tarlang a ni. A fanu thlalak hi hun reilo te chhungin mi maktaduai 15 chuangin an like a, Beyonce record hi a rawn khum ta a ni.

Beyonce hian February, 2017 khan record hi a lo siam tawh a, a rai puarlai thlalak hi mi maktaduai 11 chuangin an like a ni. Jenner hi American rapper Travis Scott nen hun eng emaw chen an inkawp hnuah, tun hnai khan fa an nei a ni.