Mr. Big drummer Pat Torpey a thi
American hard rock band 'Mr. Big'-a an drummer Pat Torpey chu Nilaini khan kum 64 mi niin a thi. A thih thu hian music khawvel a deng chhuak rang hle a, lainattu pawh a ngah hle.
Pat Torpey hian Parkinson disease a vei tih kum 2014 khan hriat chhuah a ni a, hei hi a thihpui ta a ni.
Parkinson disease hi boxer rothap Muhammad Ali pawhin a lo thihpui tawh kha a ni a. Torpey pawh hian hun rei tak chhung chu chhel takin tur mah se, a tuar chhuak zo ta lo a ni. A natna hmuhchhuah a nih hnu hian mipui hmaah a inlan zui tawh meuh lo a, in enkawl nan a hun tam zawk a hmang.
Torpey hi an band-ah hian drummer a nih piah lamah, background vocalist a ni bawk a, mi pawimawh ber pakhat a ni. Mr. Big dintu zinga mi a ni bawk a, ngainat leh hriat pawh a hlawh hle. A thih chungchangah hian Mr. Big member dangte chuan thuchhuah siamin, an member hi an ui tak zet thu leh, a kalsan tak a chhungte an tawrhpui thu an tarlang. "Mr. Big-in chanchin lungchhiat thlak tak kan nei a, rilru pawh a na tak zet a ni. Band dintu zinga mi, drummer leh kan unaupa ni bawk Pat Torpeyn chuan min kalsan ta" tiin, Pat Torpey an a ui thu an tarlang.
Mr. Big hi kum 1988 khan Los Angeles, California-ah din niin, Eric Martin (vocalist), Paul Gilbert (guitarist), Billy Sheehan (bass guitarist) leh Pat Torpey (drummer)-te chu member an ni. Eric Martin hi nikum khan India ramah a rawn chhuang chhuak a, Mizoram-ah pawh concert a rawn nei a ni.
Mr. Big hi a hun laia khawvel rock band lar ber pawl niin, khawvel hmun hrang hrangah tour neiin an zin kual nasa hle. Kum 2002 khan an kehdarh a, kum 2009 khan indin thar lehin album pathum lai an tichhuak leh a ni. An album hnuhnung ber 'Defying Gravity' chu nikum khan tlangzarh a ni.