Batgirl thar tur Leslie Grace

'In the Heights' star Leslie Grace chu DC khawvel lamah kan hmu dawn a Barbara Gordon aka Batgirl lemah a chang dawn.

Hemi chungchang hi The Hollywood Reporter chuan a chiang tawh nia tarlangin hun eng emaw chen chhung tunge Batgirl lemah chang dawn tia zawhna awm tawh chu tunah chuan chhanin a awm ta a ni.

Bad Boys for Life film siamtu Adil El Arbi leh Bilall Fallah te chuan Batgirl hi an direct dawn a, Birds of Prey lama a sulhnu kan hmuh tawh, The Flash film-a a sulhnu kan hmuh leh tur ni bawk, Christina Hodson chu script ziaktu tur niin Kristin Burr chuan a produce ang.

Leslie Grace hian rimawi lamah pawh sulhnu lo hnutchhiah nualin Latin Grammy Award lamah phei chuan nomination pathum lai a hmu tawh nghe nghe a, a hla pahnih 'Will U Still Love Me Tomorrow' leh 'Be My Baby' te phei chu Billboard Latin Chart lamah top 10 hial a lo thlenpui tawh a ni.

Batgirl film hi engtikah nge tlangzarh a nih dawn hriat a la ni lo a, kum 2023 velah chuan kan hmuh hman hmel.

Kum eng emaw zat chhung chu Batgirl film hi siam a ni dawn nia sawi rik a lo ni tawh a, kum 2017-a director tur leh script ziaktu tura an biakfel tawh Joss Whedon chu kum 2018-a inhnuhdawh leh tak si avangin hun eng emaw chen chu an reh zui a, mahse tunah chuan achangtunu tur thlengin kan hre thei ta a ni.

DC Comics chhiar ṭhinte chuan Batgirl hi chu an hrefur ang. Batman sidekick zinga mi niin Gotham Police commissioner Jim Gordon fanu a ni. Kum 1961-ah he character hi a inlan ṭan a, a tirah chuan Betty Kane tih a ni ṭhin.

Kum 1967-ah khan a vawi khatna atan Batman TV series-ah hmuh a ni a, kum 1997-a tlangzarh Batman & Robin film-ah pawh khan Alicia Silverstone chu Batgirl lemah a lo chang tawh bawk a ni.