RFL Miss Mizoram 2020 Zirsangpuii

RFL Miss Mizoram 2020 chu hun eng emaw chen kalpui a nih hnuah Inrinni zan khan a hmawr bawk a ni a, R Dengṭhuama Hall, Mualpuiah Grand Finale ropui taka neih niin; Miss Mizoram Khawzawl Zirsangpuii chu Miss Mizoram 2020 atan thlan a ni.

Inrinni zan a ni a, Mizo mipui tam tak rilru Mualpui lamah a awm. Zan dar 8 a ri a, Jojo-i'n a hla thar 'Thinlung neitu' hmangin RFL Miss Mizoram 2020 Grand Finale programme a hawng a, boruak a ṭang nghal at mai. Miss Mizoram contestant-te'n modeling piah lamah lam an thiam tih an lantir. Mit leh beng a tlai nghal.

Sponsor-tu leh endiktute hmelhriattirna neih zawh a nih hnuah, contestant introduction neih leh nghal a ni. Host Rini Hlondo a zei bawka, thlirtute'n programme rei an pawiti dawn lo tih a hriat theih nghal bawk. Michelle Varte-in 'Chawng­tinleri' hmanga mipui a awi zawh hnuah Mizo puan bih ngei maia contestant-te rawn chhuak chu hmuh an nuam kher mai. Mizo mitah chuan kan nulate'n puan an han bih zaih hian an lo mawipui ber niin a lang.

Subtitle pali puan a ni a, chumi zawhah Mizo Idol Jerry Lalrinawma'n 'Simple the Best' hmangin mipui a awi leh a, a zaithiam zia sawinawn a ngai lo.

Evening Gown hmanga contestant-te an rawn inlan leh hnuah Kimkima'n a hla thar 'Ṭhahming' a rawn sa leh a, Kimkima zai laia Contestant-te an rawn chhuak chu thawm a ṭha kher mai. Top 12 puan a ni a, Top 12-a inhlangkaite'n zawhna zawttu tur pawt ṭheuhin judge-te zawhna an chhang nghal a, chumi zawhah Designer leh MUA-te hnenah lawmthusawina hlan nghal a ni.

Top 6 result puan a ni zui a, top 6-te hian zawhna inang an chhang a ni. An contestant puite'n zawhna an chhan lai hian headphone-ah hla ring tak an lo ngaihthlak avangin an ṭhiante zawhna dawn leh chhanna hi contestant-te chuan an hre lem lo.

Zawhna an chhan zawh hian mipui lam chuan an chhanna aṭangin an rilruah an 'Miss' tur an tlang fur tawh hlawmin a rinawm a, chu an 'Miss' chu Miss Mizoram a ni dawn em tih thlirtute chuan nghakhlel takin an thlir a ni.

Boruak a sang chho a, chutih lai tak chuan You Got Talent star Ruatpuii'n 'One Moment in Time' a rawn sa, boruang sang aia sangin a rawn zai ti ila kan sawi uar lutuk awm lo e. A zaithiam bawka a hmuna kal thlirtute chuan thildang an ngaihtuah thei lo.

Ruatpuii a zai zo a, contestant-te a tawpna tura rawn inlan lehin result puan a ni zui a, Miss Mizoram Khawzawl Zirsangpuii luah Miss Mizoram crown hlan a ni. ta a ni.

Zawhna :

    Mizo ṭhalaite hian kan nu leh pate leh kan rual ûte hi kan chawimawi theih dan ṭha ber tur eng nge? 

Zirsangpuii Channa :

    Mizo ṭhalaite hian kan nu leh pate leh kan rual ûte hi kan chawimawi theih dan kawng tam tak a awm a, thil ropui deuh, mi zawng zawng hriat theih khawpa chawimawi kher a ngai lo a; kan nitin nunah thil ho teteah hian kan chawimawi thei reng mai a, chu chu kan hre lo 

ṭhin.

    Kan chawimawi theih dan nia ka hriat chu a hmasa berah Tlawmngaihna, Mizo hnama bet tlat Tlawmngaihna kan chhuah hi kan chawimawina a ni a. Tin, kan nu leh pate hi eng ang mi pawh nise, lehkha thiam lo pawh nise, kan zahpui loh hian kan chawimawiin ka hre bawk a, tin, a bikin nu leh pateah, an piancham te, an ni pawimawhte kan hriatpui zel hi kan chawimawi theihna a ni bawkin ka hria.

Miss Mizoram Khawzawl 

= RFL Miss Mizoram 2020

Miss Mizoram dinhmun hial thleng thei Zirsangpuii hi Khawzawl district Miss a ni a,  VL Beiseia fanu niin,  Khawzawl Vengtharah an cheng. Aizawl College aṭangin BA Education a zo tawh a, zir chhunzawm leh tuma inbuatsaih mek a ni bawk.

Height    :    5'5"

Age    :    23 Years

"    Lawmthu sawina tur hlir a ni a, a hmasa berah Pathian hnenah lawmthu ka sawi mawlh mawlh a ni.

"    Ka bul min ṭan saktu District MJA leh Kan DC-te chungah ka lawm tak zet . Ka khaw mipuite leh kan District chhungte'n min support-na a ropui, Khawzawl welfare-te ka tan nu leh pa chanchangin leh kan bialtu Dy CM Tawnluia kan tan a inpe em em a, ka van lawm tak em.

"    Tin,  Ka chhungte, ṭhian ṭhate leh mimal ang pawha  min duhsak em em tu kannei a kalawm zia chu in hriat vek kha . Tichuan Miss mizoram organiser lam MJA leh Zonet Cable network ten hetiang ti thei tur a platform tha anlo buatsaih hi ka lawm tak zet tun dinhmun ka din theihna tur alo nireng mai ka lawm takzet.

"    Lawmna tur hlir a ni sawisen a ni lo ang. Sawi awm sawi kim loh pawh ka nei ang, ka tan a inpe a, min duhsak tu te zawng zawng Lalpan malsawm vek che u rawhse," tiin Vanglaini kaltlangin lawmthu a sawi.