Taylor Swift-in Fearless (Taylor's Version) Grammy-ah a thehlut dawn lo

Taylor Swift chuan kum 2008-a a tlangzarh, 'Fearless' a record ṭhat leh chu Grammy leh CMA awards lama thehlut lo turin thutlukna a siam.

Kum 10 chuang chhung zaithiam huhang ngah ber pawh ni tawh Taylor Swift hian Grammy award pali lai 'Fearless' original record hmang khan a dawng a, CMA pawh a dawn phah nual bawk. Tuna a record thar lehah hian hla thar paruk lai awm mah se Grammy leh CMA awards lama thehluh loh a titlu ta a ni.

Republic Records thu­chhhuah siam Billboard-in a tarlanah chuan, "Uluk taka ngaituah a nih hnuah, Taylor Swift chuan Fearless (Taylor’s Version) chu Grammy leh CMA Awards eng category atan mah a thehlut dawn lo a ni," tiin a inziak.

Hetihlai hian 'Shake It Off' hitmaker hian nikuma a tlangzarh 'Evermore' erawh a thehlut dawn tih a chiang a, kumin Grammy-ah khan 'Folklore' hmangin Album of the Year award a lo dawng tawh bawk a nih kha.