Miss Mizoram 2020 Top 3
Champhai District miss, Lalmuansangi chu 2nd Runner Up a ni a, Lily Darnei chuan crown a khum tir. 1st Runner up Zomuanpuii Fanai, Mamit District Miss chu Miss Mizoram 2018 2nd Runner Up CT Malsawmsangi'n crown a khumtir ve bawk.
Miss Mizoram 2020, Zirsangpuii chu Miss Mizoram 2018 T Ramthanmawii'n crown a khum tir bawk a ni.
Miss Mizoram 2020 - Zirsangpuii
1st Runner Up - Zomuanpuii Fanai
2nd Runner Up - Lalmuansangi
• Miss Mizoram 2020 hian lawmman pawisa fai Rs 1,70,000 leh Yamaha Fascino 125 Fi scooter a dawng.
• 1st runner up-in Rs 90,000 a dawng.
• 2nd runner up-in Rs 60,000 a dawng a ni.bawk.
• Top 12-a tling, top 3-a inhlang kai ta lote pawhin Rs 10,000 ṭheuh an dawng.
• Sub-title tin hian Rs 20,000 lawmman a keng tel vek bawk.
• Top 6-te hi Mawi Infinity Villa, Mumbai bula resort nuam takah an kal dawn.
• Top 3-te hian Holiday Pakage, Goa-a kalna tur an dawng ṭheuh a ni.
Contestant-te'n zawhna an chhang ṭha
Contestant-te'n a tlangpuiin zawhna an chhang ṭha hle. Top 12-a tlingte'n an zawhna dawn an chhang ṭha a, thlirtute beng aṭang chuan Top 6-a tling tur pawh hriatthiam a har ngei ang. Top 6-a tlingte pawhin zawhna an chhang ṭha leh hle a ni.
Mipuiin Miss Mizoram an hlut
R. Dengṭhuama Hall-ah mipui ṭhutna tura zuah chin luahkhat vek khawp mipui an pungkhawm. Covid-19 vanga mipui chiaina karah khatiang zat mipui an pungkhawm thei khan mipuiin Miss Mizoram an hlutzia a tilang. Chu mai a la ni lo, YouTube-ah mi sing hnih dawnin an thlir deuh reng bawk a, TV lama thlirtu nen phei chuan in lam aṭang pawhin entu an ṭhahnem tih a hriat. Grand Finale programme zawhah pawh social media lama titu luahtu ber a ni nghal.
Modelling agency Kay Savino Yhome Scouting chu Miss Mizoram 2020 Modelling Agency Partner a ni a, anni hian contestant pahnih contract an ziahpui tur an thlang a, chu chu Grand Finale zanah hian an puang nghal. Heng mite hi Kay Savino Yhome chuan an thlang.
- C Lalhmangaihzuali
- Sylvia Lalvenpuii