Netflix : Kumin Q2-a film entu tam ber Army of the Dead
Zack Snyder-a zombie heist movie 'Army of the Dead' chu kumin second quarter chhung, April aṭanga June inkara Netflix-a film en hlawh ber a ni a, Kevin Hart-a channa 'Fatherhood' chu en hlawh ber dawttu niin DC Comics adaptation film 'Sweet Tooth' chu series zinga entu tam ber a ni thung.
Army of the Dead entu an tam
Army of the Dead hi May 14-a tlangzarh kha a ni a, $mtd 70-90 vel lai senga an siam niin Netflix film budget sang pawl a ni. A changtute an ṭha a, director lah tunlaia director huhang ngah ber pawl a lo ni bawk nen, hetiang taka a hlawhtling hi a mak lo. Box Office lamah mumal taka tihchhuah a nih loh avangin sum eng zat nge a hmuh chhuah, tih ang zawng tak erawh data hmuh tur a awm meuh lo.
Tlangzarh a nih aṭanga ni 28 chhung khan chhungkaw maktaduai 75 velin an en anga chhut a ni a, entu an tam turu hle a ni. Netflix-a film tlangzarh tawh zinga entu tam ber pawl pawh a ni tawh a, kumin May leh June inkarah phei kha chuan Netflix film miin an en nasat ber a ni hial.
Fatherhood dinhmun
American comedy-drama film 'Fatherhood' hi June 28 khan tlangzarh niin tlanzarh aṭanga ni 28 chhungin chhungkaw maktaduai 2 velin an en anga chhut a ni thung a, kumin Q2-ah chuan 'Army of the Dead' dawttu chiah a ni.
Series lamah chuan
Robert Downey Jr. executive producer a nihna 'Sweet Tooth' chu tlangzarh a nih aṭanga kar li chhungin subscriber mtd 60 velin an en thung a, 'Shadow and Bone' chuan dawtin mtd 55 velin an en anga chhut a ni ve bawk.
Omar Sy-led French mystery thriller 'Lupin' season 2 chu subscriber mtd 54 velin an en thung a, season hmasa erawh a pha ta lo a ni. Season hmasa kha kar li chhungin mtd 76 vel laiin an en thung.
Film en hlawh ber erawh 'Extraction' a la ni reng
Netflix-a film tihchhuah tawh hoah erawh Chris Hemsworth channa 'Extraction' kha a la chungnung fal hle a, kha film kha tlangzarh a nih aṭanga kar li chhungin chhungkaw mtd 99-in an en hman a ni. Pahnihna chu Sandra Bullock channa 'Bird Box' kha a ni a, kha film kha ni 28 chhungin chhungkaw mtd 85 velin an en hman a, Mark Wahlber channa 'Spencer Confidential' pawh kha chhungkaw mtd 85 velin an en anga chhut a ni bawk.
Army of the Dead 2 siam dawn
Kumin Q2-a Netflix film hlawhtling ber 'Army of the Dead' chu a chhunzawmna Netflix lama tihchhuah tur bawkin siam a ni dawn tih a chiang ta.
Zack Snyder bawkin a direct leh dawn a, film hmasa co-writer Shay Hatten nen an thawkdun leh dawn a ni. A chhunzawmna an siam tur thu hi chiang tawh mah se hma an lak ṭan hun tur erawh a la chiang lo. Snyder hian tunah hian sc-fi adventure film 'Rebel Moon' a buaipui mek a, he film an siam zawh hnu lamah hian Army of the Dead 2 project hi an ṭan chauh dawn thung.
'Rebel Moon' ni nakkum kum tir lamah an chang ṭan dawn a, chuvang chuan Army of the Dead 2 hi chu kum 2023 hmalamah chuan kan hmu hmanin a rinawm lo. 'Army of the Dead' hi a hlawhtling bawka, tunah hian a franchise a piang der tawh hrim hrim. A prequel film 'Army of Thieves' chu kumin kum tawp lamah hian an siam ṭan dawn nia sawi a lo ni tawh a, a spin-off anime series 'Army of the Dead: Lost Vegas' pawh nakkum kumtir lamah chuan Netflix-ah tho tlangzarh hman an tum a ni.