Johnny Depp leh Jeff Beck an thawk dun

British guitarist Jeff Beck leh lemchan thiam, Hollywood Vampires guitarist Johnny Depp-te chuan tunah hian music an siam dun mek niin khawthlang media-te chuan an tarlang.

Hollywood Vampires rocker hian 'Hi Ho Silver Lining' guitarist hi a album thar turah a pui nia sawi niin hemi chungchang hi Daily Mail chuan a tarlang a ni.

"Jeff hi Johhny a ṭhian ṭha tak a ni a, hun harsa a tawh laia a ṭhian hnai tak a nih bakah Hollywood hlata a awm laia Johnny-a mamawh tak pawh a ni," tiin an ziak.

Johnny Depp hian rimawi lamah sulhnu a hnutchhiah nual tawh tih hi mi ṭhenkhat chuan an hre lo mai thei. Alice Cooper leh Joe Perry-te nen kum 2015 khan Hollywood Vampires band an din a, studio album pahnih lai an tichhuak tawh. Chung an album tihchhuahate chuan musician hrang hrang an thawhpui ṭhin a, chung zingah chuan Paul McCartney, Dave Grohl, Joe Walsh, Zak Starkey leh Christopher Lee-te pawh an tel.