Bangalore Fashion Week-ah Mizo an che ṭha

February 9 -10 khan Bangalore khawpuia Clarks Exotica Resort & Spa-ah, Bangalore Fashion Week (BFW) neih a ni a, he hunah hian Mizo designer pakhat leh model pahnih an inlan. Mizo telte hi an che ṭha a, lawm pawh an hlawh hle.

Tun ṭum BFW hi Dream Merchants buatsaiha neih niin, India rama designer ṭha mi 18 an tel a ni. He hunah hian hmarchhak aṭangin designer pakhat a tel a, chu chu Lushai Designs neitu Mami Khawlhring a ni. A ni bakah hian Mizo pahnih - Miss Mizoram title kawl mektu Rody H. Vanlalhriatpui leh model Nunui Rualhleng te an tel a, anni hian a kutchhuakte an inbel a ni. Mizo telte hian lawm an hlawh hle a, show-a inlan leh tura sawmna pawh an dawng nual. Rody leh Nunui te hi designer eng emaw zatin an kut­chhuak inbel sak ve turin an sawm nghe nghe. Mami hian a kutchhuak hrang hrang pho chhuakin, a design hi model 14-te'n an inbel.

Bangalore Fashion Week hi India ramah chuan fashion show ngaihhlut ber pawl niin, designer leh model inlante pawh an hrawl ṭhin hle. A tel tur pawh uluk taka thlan ṭhin a ni a, portfolio thehluh aṭangin a tel thei turte thlan ṭhin an ni. Designer te hian model an hruai ngawt thei lo a, dilna mumal tak siam a ngai. Mami pawh hian model paruk a dil a, mahse pahnih chiah hruai phalsak a ni. Model inlan turte hi feet 5.8 an tlin ngei a ngai bawk. Show chhim thei chin pawh bithliah thlap niin, sawm bikte chauh an tel a ni.