Spice Girls-in talent show buatsaih tum

English pop girl group 'Spice Girls' chuan chanchin thar an rawn nei leh ta zauh zauh a, tunah pawh global TV talent show buatsaih an tum thu an puang leh tawh.

Spice Girls manager Simon Fuller chuan talent show buatsaih an tum chungchang hi sawiin, UK, US, Japan, China leh Australia-ahte kalpui an tum thu a sawi. Hetih rual hian eng angin nge kalpui a nih dawn chiang taka an la tarlan theih loh thu a sawi a ni. Tun hnaiah Spice Girls hian reunion an nei leh dawn nia sawi a awm a, ngaihven pawh an hlawh nghal hle. Kum 1994-a din Spice Girls-ah hian Victoria Beckham, Mel B, Mel C, Emma Bunton leh Geri Horner-te chu member an ni a, hun eng emaw chen an kehdarh tawh hnuah an intuai thar leh dawn niin thu a thang. Hetih lai hian an member Victoria Beckham chuan hei hi a thleng dik dawn lo niin a lo sawi ve mek thung.