India ramah Whatsapp money transfer tlangzarh a ni ta

Whatsapp hmangtute tan thu lawmawm a awm leh ta! Whatsapp hmangtute tan money transfer tih theihna tur tlangzarh a ni ta a, a Whatsapp account leh bank account i thlunzawm chuan Unified Payments Interface (UPI) kal tlangin pawisa i thawn zung zung thei tawh dawn tihna a ni.

Whatsapp money transfer hi Inrinni khan India ramah tlangzarh a ni a, engtiang chiahin nge a hman zui theih dawn tih chu a hriat thuai dawn a ni. Whatsapp hmangtu zawng zawngten an hmang nghal vek thei dawn lo tih chu a chiang tawh a, zawi zawiin a lian chho zel dawn niin a lang. A hmang duh tan chuan bank account nena thlunzawm a ngai a, midang thlunzawm ve thote hnenah pawisa a thawn theih dawn a ni.

India rama chanchinbu lar, Times of India pawhin hemi chungchang hi a tarlang tawh a, hun reiloteah a nihna tur ang taka hman theih beisei a nih thu a chhuah. Money transfer hi mimal tan chauh tih theih a la ni rih a, sumdawnna atan hman theih a ni lo. Whatsapp kaltlangin i ṭhian leh chhungte i thawn thei ang a, ticket book nan leh thil dangah chuan a la hman theih loh thung. Hetih rual hian company lam chuan bank thawhpui tur an zawng mek a, an tum anga an hlawhtling thei a nih chuan huang zauh zel an tum a ni. Bank tarlan zingah hian HDFC, Axis, ICICI, SBI, Yes Bank, Allahabad Bank leh Punjab National Bank te an tel.

UPI hi digital inter-bank peer-to-peer fund transfer system niin, National Payments Corporation of India (NPCI) hnuaia awm a ni. NPCI hian UP payment application hran BHIM an nei bawk. Whatsapp co-founder Brian Acton chuan India ramah money transfer kalpui a nih tur thu hi a lo sawi tawh a, US leh UK-ahte pawh peer-to-peer payment hi kalpui a nih tawh thu a sawi.

India ramah hian whatsapp hmangtu hi mi maktaduai 200 vel awm anga chhut niin, heng mite hman tur hian application hrang hrang pawh duan chhoh zel a nih a rin awm. Thu, thlalak leh video inthawn darhna application hman tlanglawn ber Whatsapp hian India leh Brazil ramahte WhatsApp for Business application an lo tlangzarh tawh bawk. Hei hi sumdawnna lam huangzauhna niin, India bikah chuan Flipkart chuan a takin an kalpui tawh a ni.