Benjamin Sum 'Chhingmitin Biahthu Kan Hlan' Music Video a chhuak ta

Tunlaia Zoram dung leh vanga zaithiam lawm hlawh ber pawl leh a zai ngaihthlak hlawh ber zinga mi Benjamin Sum chuan Mizo hla offi-cial-a a tihchhuah hmasak ber 'Chhingmitin Biahthu Kan Hlan' music video chu a tichhuak tawh a, vawiin lamah hian YouTube lamah en theihin a dah chhuak dawn.

Benjamin Sum hian a music video thar hi Zonet lamah chuan a tichhuak tawh a, zanin aṭangin YouTube lamah a duh apiang tana thlira ngaihthlak theihin a awm tawh dawn a ni.

'Chhingmitin Biahthu Kan Hlan' tih hla hi chu kan hrefur tawh hlawmin a rinawm, tunlai lengzem hla zinga hit ber pawl a ni mek. Thla hnih kal ta velah khan lyric video a tichhuak tawh a, chu ringawt pawh chuan thlirtu maktaduai 2.6 chuang a nei der tawh!

Benjamin-a hla thar hi tunlai lengzem hla lar tak tak phuahtu Rpa Ralte phuah bawk niin music producer pawh a ni nghal. Guitar rimawi tak kha Ephraim-a kut chhuak a ni thung.

Benjamin Sum-a'n 'Tunah Erawh Zawng' tih hla thiam taka a cover-na YouTube-a a dah kha kan hre ṭheuh awm e, kha kha Rpa hian lo hmu fuhin zai thiam a ti viau a ni ang, Rpa chuan hla siam dun puiah a va sawm ta niin a sawi.

Rpa chuan,"He hla hi a tirah chuan a hla thu a dang a, Bena sak tur nena inrem deuhin, tleirawl lai hmangaihna leh induhna thianghlim tak angin ka lo ziak chhuak ta a ni," tiin he hla lo pian dan a sawi bawk.

Music video hi Aizawl lama total lockdown puan a nih avangin an siam lawk thei lo a, mahse tunah erawh Moonshine Studio-in mawi takin an rawn chhawp chhuah sak thei ta a ni.

YouYube aṭanga sum a hmuh hi Covid-19 vanga harsatna tawkte theih ang anga ṭanpuina atan hman a ni dawn a, chuvang chuan Benjamin Sum fans, 'Summers' zawng-te chu lo thlawpa lo thlirsak ṭheuh turin an sawm a ni.