Box Office : Hmahruaitu 'OLD' A hnuaiah 'Snake Eyes'

Box Office-ah 'Old' chuan sum a lalut tam ber a, 'Snake Eyes' chu sum lalut tam ber dawttu niin 'Black Widow' chu pathumna a ni.

'Old' is Gold
Zirtawpni liam taa tlangzarh 'Old' chu North America Box Office-ah sum lalut tam ber a ni a, kar liam ta chhung khan theatre 3,355-ah pek chhuah niin $16,854,735 a lalut.

He film hian ram dang aṭangin $6,733,000 lalut ve bawkin $23,587,735 a lalut tawh a ni.

Trailer aṭanga hmu tawhte chuan he film kalhmang tur awm ang chu an hre tawh awm e, chhungkaw pakhat chawlh hmanga tuipui kama hun hmangte chu darkar rei lote chhungin an upa zung zung mai a nih hmel a, a hmuhnawm phian tih a hriat.

A film genre chu thriller a ni a, Gael García Bernal, Vicky Krieps, Rufus Sewell, Alex Wolff, Thomasin McKenzie, Abbey Lee, Nikki Amuka-Bird, Ken Leung, Eliza Scanlen, Aaron Pierre, Embeth Davidtz, leh Emun Elliott-te chu a changtu berte an ni.

Mizo ṭhalaite en chak 'Snake Eyes'
Mizo ṭhalaite en chak tak tur 'Snake Eyes' chu pahnihna a ni thung a, kar liam ta chhung khan theatre 3,521 aṭangin $13,367,853 a hmu chhuak.

G.I Joe spin -off film 'Snake Eyes: G.I. Joe Origins' hi chu trailer tihchhuah a nih aṭang khan Mizo zingah en chaktu an tam tih a hriat nghal a, $mtd 88–110 vel lai senga an siam niin an budget erawh an la pha lo hle.

Film review-tu lam beisei a pha vak lo a nih hmel thung a, Rotten Tomatoes-ah review 98 aṭangin 5.1/10 chiah a hmu phak a, a script kaldan piah lamah editing leh action scene kalphung chuan sawisel a hlawh laiin a changtute chevel erawhin fak a hlawh viau thung a ni.

Film thar a awm nual
Kar hmasa khan film tlangzarh thar a awm nual a, tlangzarh thar zinga mi 'Joe Bell' erawh 11-na a ni pha ṭawk thung.

Kaamelott: First Installment (17), Unknown Title (22), Once I Was Engaged (23), Ailey (26), Settlers (27), Settlers (31), Without Getting Killed or Caught (32) leh Here After (34)-te chu film thar an ni bawk.

Box Office Mojo chart-ah film 47 lai tarlan a ni tawh a, hei hian khawthlang lam film industry-in ngai a awh chho leh ṭan viau tih a tilang awm e.

Black Widow, F9 sum lakluh a tam tawh
North America Box Office-a pathumna ni mek 'Black Widow' chuan khawvel ram hrang hrang aṭangin $mtd 315 zet sum a lalut tawh. Hripui leng kara hun rei lote chhunga hetiang zat sum a lalut thei hian mipuiin 'Black Widow' an ngaihven zia a tilang chiang hle.

'Fast & Furious 9' pawhin $mtd 621.3 zet sum a lalut ve tawh bawk a ni. F9 hi tunah hian Box Office-ah pangana a ni mek bawk.