YouTube-a group thlir hlawh ber BLACKPINK

K-Pop group Blackpink chuan YouTube-ah record thar duhawm tak mai an siam leh ta!

Kum 2016-a indin Jisoo , Jennie , Rosé leh Lisa-te hi group anga YouTube-a miin an thlir nasat ber an ni ta a, an YouTube video thlirtu zawng zawng belhkhawm thlirtu chu tluklehdingawn 18.69 an ni hem tawh mai. Group, duo emaw band emaw anga he platform-a account nei zingah chuan anni aia thlirtu tam an awm ta lo.

Blackpink hmaa he record lo chelh tawhtu chu American rock band Maroon 5 an ni a, anni hian tunah hian an video hrang hrang thlirtu tld 18.67 vel an nei mek a, Blackpink hian tunhnaiah khan an rawn lehpel ta a ni.

Pathumna chu Coldplay ni thungin an video hrang hrang thlirtu belhkhawm chu tld 12.65 a tling ve bawk.

Kan hun hman mekah hi chuan Blackpink hi chu rimawi huangchhunga huhang nei lian ber pawl an ni hrim hrim a, rimawi khawvelah kum 5 vel awrh chauh hun an la hmang tihah an music video 'DU-DU DDU-DU', 'Kill This Love', 'BOOMBAYAH' leh 'As If It's Your Last'-te chuan thlirtu tld an nei tling der tawh. Tin, ni hnih thum liam ta lawkah khan an 'Ice Cream' music video khan thlirtu mtd 600 a nei tling leh tawh bawk.

Blackpink hian August thlaah hian an kum 5 tlin an lawm dawn a ni.