‘Pokémon’ Live-Action Series NETFLIX lamah?

‘Pokémon’ Live-Action Series siam turin Netflix lamah hmalak ṭan mek a ni tih Deadline chuan an tarlang tlat mai!

An tarlan dan chuan hemi chungchang hi thui tak an la hre bik loa, mahse an thudawnna chuan Lucifer co-showrunner leh EP Joe Henderson chu he series script buaipui tur leh executive producer tur atan an be tawh niawm tak a ni.

Deadline chuan Netflix leh Henderson aiawhte chuan hemi chungchangah engmah an la sawi chiang duh lo niin an tarlang thung a, mahse eng emaw ri ret ret chu a awm ni ngeiin a lang.

Pokemon hi kum 1995-a Satoshi Tajiri siam chhuah niin a tirah chuan video game a siam a ni a, video game adaptation-ah chuan hlawhtling ber pawla ngaih a ni.

Tunah hian a anime series episode sang chuang a awm tawh a, live-action adaptation movie pakhat siam a ni tawh bawk.

‘Pokémon’ fan-te tan thu lawmawm a ni ang em?
Ngaihdan chu a inang lo hlawm viau mai thei a, mahse ‘Pokémon’ fan tam tak tan chuan thu lawmawm a ni kher lo mai thei.

Anime live-action adaptation hi a fuh lo deuh deuh a awm nual tawh. A bikin 'Attack on Titans' leh 'Full-Metal Alchemist' live-action adaptation-te khan sawisel a hlawh angreng. Chutih rualin Pokémon erawh kum 2019-a 'Detective Pikachu' tihchhuah a nih khan a hlawhtling viau lawi si!

Mahse Pokémon ang hi chu CGI nasa taka hman ngaihna a ni dawn a, Netflix hnuaia pek chhuah tur a nih chuan budget an seng tam ngam ang em tih erawh Pokémon fan-te ngaihtuahna tithui tu a ni ngei ang.