Khawvela river island lian ber Majuli

Khawvel huap a nih tawh hi chuan eng thil pawh nise a nep thei lo a, a ṭha ber a ni emaw a chhe ber pawh nise a dah­hniam ngawt theih loh. Tuifinriat zau zia sawi nawn a a ngai lo a, thliar kar lian leh mak­pui pui pui tam zia pawh inhrilhnawn a ngai lo. Hetih lai hian khawvela River Island lian ber chu India hmarchhak state Assam-a awm a ni teh daih. Kum 2016 khan Guin­­ness World Record chuan Assam-a thlaikar lian tak mai Majuli hi khaw­­­vela 'River Island' lian ber a nih thu a puang a ni.

Majuli hi Brahmaputra luiin a siam niin, tuipuin a hual vel vek a ni. Brahma­putra lui hi kum tin alen ṭhin avangin a kuang pawh a inthlak nasa thei hle a, Majuli pawh ni nasa takin a danglam ṭhin. Tuilian hian khawmual chin a tihzau chang a awm a, a ei hek zawk ṭum a thleng fo bawk. Tui­in a hual miau avangin a area pawh a danglam nasa thei hle a, tunah phei chuan khawvela thliarkar lian ber a lo ni ta a ni. Brazil rama Marajo chu khawvela thliarkar lian ber ni ṭhin a ni a, Majuli hian a rawn khuam ta a ni.

World heritage Site
United Nations Edu­ca­tional, Scientific and Cultural Organisation (UNESCO) chuan Majuli hi 'Cultural Landscape' category-ah World Heritage Site-ah puangin, hmun vawn ṭhat leh enkawl bik zingah a tel. World Heritage award. A tirah chuan tentative list-ah dah phawt a ni a, 2008-a China-a World Heritage Committee session-ah pawm a ni ta a ni. Hemi hnu hian a lar chak zual a, tunah chuan Assam-a khualzinte hipluttu ber pakhat a ni tawh. A zauh zawng hi Sq.km 880 niin, Brahmaputra leh Subansiri lui inzawmna lai bawra awm a ni.

Majuli hi kum 2016 khan district-ah puan a ni a, India rama thlairkar district-a puan hmasak ber leh awm chhuna ni. He thliarkar hi Assam chief minister Sarbananda Sonowal-a bial niin, hnam chi thum - Mising, Deori leh Sonowal Kachri-te an khawsa a, mihring 1,60,000 vel an cheng a ni.