Box Office-a roreltu thar Fifty Shades Freed
American Drama/Thriller film 'Fifty Shades Freed' chu February 9 khan tlangzarh a ni a, Box Office-ah sum lalut hnem ber a ni nghal. Hun rei tak chhung chart-a pakhatna lo luah tawh Jumanji: Welcome to the Jungle chu a sumlak luh tlahniamin, palina-ah a awm.
Fifty Shades chhuak thar Freed hian kar khat chhungin $mtd 38.8 a lalut a, khawvel hmun hrang hranga a sum lakluh zat chu $mtd 135 a ni. A sum lakluh hi tam viau angin lang mah se, tlangzarh aṭanga sum lakluh tam lamah Fifty Shades chhuak hmasate a pha lo. Nikum February thlaa tlangzarh Fifty Shades Darker khan tlangzarh karah $mtd 144 a lalut a ni. Heti chung hian Jamie Dornan, Dakota Johnson, Rita Ora leh Arielle Kebbel-te channa hian ngaihven a hlawh a, sum pawh a hailut hnem viau tho a ni.
Box Office-a pahnihna chu Peter Rabbit nin, a sum lakluh zat chu $mtd 25 a ni. He adventure film hi February 9 tho khan tlangzarh a ni a, film chhuak thar zinga en hlawh ber pawl a ni mek. The 15:17 to Paris chu sum lalut tam pathumna niin, kar khat chhunga Cinema atanga a lakluh hi $mtd 12.6 a tling. Jumanji: Welcome to the Jungle chu a sumlakluh tlahniam deuh mah se, top 5-ah a la lang phak. Nikum December-a tlangzarh a nih hnu khan $mtd 859.4 zet a lalut tawh a, Box Office-ah pawh hun rei tak chhung a lang tawh. Jumanji hnuaiah hian The Greatest Showman a awm ve thung a ni.
Maze Runner: The Death Cure chu sum lalut tam parukna niin, tun thlaa tlangzarh Winchester chuan a dawt. Sum lalut tam 10 zingah The Shape of Water pawh a lang leh a, a sum lakluh pawh USD maktaduai thum lai a la tling a ni.