Drummer ropui Joey Jordison a thi

Heavy metal band ropui Slipknot drummer hlui, Nathan Jonas "Joey" Jordison chu kum 46 mi niin Thawhṭanni khan a thi.

Joey Jordison hi a muhlum nia tarlan niin a chhungte'n thuhchhuah siamin a thih thu Thawhlehni khan an tarlang a ni. A chhungte chuan hetiang hian thuchhuah an siam:-

"Thinglung hrehawm tak chungin Joey Jordison, prolific drummer, musician leh artist ni bawk chu a mutnaah thlamuang takin July 26, 2021 khan a kal ta tih thu kan puang a ni."

"Joey thihna hian min tihrilhhaiin lungaihna sawifiah zawh loh min hnutchhiah a ni. Joey hretute chuan an hre awm e, thil hrethiam chak tak mi a ni a, a mize dam tak leh a rilru zau tak leh a chhungte leh rimawi ngaina mi a ni.

"Joey chhungte chuan a ṭhian te, a fan te leh media mite chu he hun hrehawm takah hian hun thawl leh privacy min pe turin kan ngen a che u. A chhungte'n midang sawm lem loin vuina hun kan buatsaih dawn a, media leh vantlang mite chu kan duhnate min zahsak turin kan ngen a che u," tiin.

MANGṬHA MAI LE JOEY

Slipknot founding member Joey
Slipknot chungchang sawi thui vak a ngai lo a, tunhnai kum 20 liam ta chhung hi chuan heavy metal band ropui ber zinga mi an ni tih chu hai rual a ni lo, hnial theih a ni bawk hek lo.

Chutiang khawpa band ropui dintu zingah chuan Joey Jordison hi a tel miau a, sawi nep chi a ni lo. Kum 1995 khan percussionist Shawn Crahan, leh bassist Paul Gray-te nen he band hi an din a, kum 2013 thleng khan he band-ah hian a tel a ni.

Slipknot a chhuahsan chungchangah hian sawi neuh neuh a tam a, Jordison chuan kum 18 lai a lo tel tawhna a bandmate-te chuan amah rawn lem loin an ban ta niin a sawi a, "Slipknot hi kum 18 chhung ka nuna bet tawh a ni a, ka phatsan ngai lo ang, ka fan-te pawh," tiin an ban tirhin thuchhuah a siam hial a nih kha.

Kum 2016-ah khan Slipknot a tel tawp lamah khan transverse myelitis natna a nei tih sawiin chu chuan drums a vuakna lamah pawh harsatna a siam niin a sawi.

Slipknot chuan Jordison hoin studio album pali an siam hman a, a thih hma lawk kha chuan Sinsaenum band-ah drummer a ni. Rob Zombie, Metallica, Korn, Ministry, Otep, leh Satyricon-te pawh a perform pui ṭhin bawk.

Khuangpui ropui, i fam ta si
Kum 2010-ah khan Rhythm magazine chhiartute chuan a kum 25 liam ta chhunga drummer ṭha berah an thlang hial a, drummer ropui tak tak- Mike Portnoy, Neil Peart, Phil Collins, leh Dave Grohl-te ai pawhin vote a hmu hnem zawk! Chumi kum vekah chuan khawvel ram hrang hrang drummer 6,500-in vote an thlak hmangin Drummies Award for Best Metal drummer a dawng bawk.

September 2013 khan rock magazine Loudwire chhiartute chuan 'World's greatest metal drummer'-ah an lo thlang tawh bawk a, kum 2016-ah khan Metal Hammer Golden Gods Awards-ah The Golden God Award hlan a lo ni hial tawh bawk a ni.

Mangṭha mai le, Joey
Joey Jordison thih thu puanzar a nih hnu lawkah khan musician leh milar tam takin an ui thu an tarlang nasa hle. Slipknot pawhin an social media account profile picture an tidum vek a, rawng dum plain tawpin post an siam bawk.