Humanitarian Award dawngtu tur : The Weeknd

Canadian singer The Weeknd chuan Black Music Action Coalition (BMAC)-in a ṭum khatna atana an buatsaih tur Music in Action Awards September 23-a an sem turah 'Quincy Jones Humanitarian Award' a dawng dawn.

Music in Action Awards hi West Hollywood, California-a Hotel 1-ah semna an nei dawn a, musician, music executive leh music hmanga sumdawng mi, kum liam ta chhunga social justice bakah danglamna leh intluktlanna thlentute hnenah chawimawina an hlan dawn a ni.

BMAC hian Berry Gordy Social Impact Award, Clarence Avant Trailblazer Award leh Agent of Change Award-te pawh an sem dawn bawk.

'Save Your Tears' hitmaker hian kum liam ta chhung khan pawisa tam tak midang tan a sem chhuak a, chung zingah chuan vun rawng vanga inthliar hranna tuartute chunga dik taka rorel a nih theihna kawngahte pawh a thawh nasa hle.

Nikum June thla khan Black Lives Matter Global Network leh Colin Kaepernick Know Your Rights Legal Defense Camp tan $200,000 ve ve a thawh a, National Bail Out Collective tan $100,000 thawh bawkin Canada-a Scarborough Health Network hnenah $500,000 a pe bawk,

MusiCares tan $500,000 pe bawkin Ethiopia-a hunger relief fund atan April thla khan $maktaduai 1 a thawh dawn thu a sawi bawk a ni.

Nikum mai ni lo, kum dangah pawh The Weeknd hi midang tan a luang chhuak nasa hle a, kum 2016 lamahte pawh khan University of Toronto-a Ethiopian Studies program-te pawh a lo sponsor tawh bakah Toronto, Canada lama a lawina ṭhin kohhran St. Mary Ethiopian Orthodox Tewahedo Church tan $50,000 lai kum 2016-ah vek khan a lo hlan tawh bawk.